FONGTIL: Governu halo prevensaun ba COVID-19 la efetivu

Diretór Forum Organizasaun Naun Governamemtal Timor-Leste (FONGTIL), Daniel Santos do Carmo, haktuir, deklarasaun Prezidente Repúblika (PR), Francisco Guterres Lú Olo nian ba Estadu Emerjénsia (EE) dahaat ne’e laran mamuk, tanba medida prevensaun husi Governu ba COVID-19 ne’e la efetivu.

“Regra ida ne’ebé Ministériu Saúde aprezenta, hetan veta husi Prezidente, ne’e tanba atu regula kona-ba liberdade movimentu sidadaun nian, liu deit husi karakter Estadu de Sítiu no Estadu Emerjénsia, entaun deklarasaun Estadu Emerjénsia ida agora ne’e, bolu dehan nia karakter ne’e  parsial, agora ita preokupa efetividade  oinsa mak atu halo prevensaun, ezemplu hanesan distansiamentu fíziku, sosial, Saúde, ijiene, ne’e problema oituan, tanba atividade hotu hotu la’o hela”,dehan Daniel Santos Carmo ba Jornalista sira Segunda (10/08/2020) iha nia knaar fatin Caicoli, Díli.

Nia subliña, “Atividade ekonómiku ne’e la’o importante, maibe oinsa mak ita nia fokus husi Estadu Emerjénsia, tuir deklarasaun husi Prezidente Repúblika, husu atu intervensaun sira iha pontu entrada, no kuarentena ne’e tenke másimu, liu-liu liña fronteira sira tantu marítima (Tasi)  no terrestre (rai-maran) tenke másimu. Se la másimu movimentu ilegal sira bele transimte Corona no bele mos daet to’o transmisaun lokal, ne’e difisil atu halo prevensaun. Oinsa mak ita nia obrigasaun liu-liu Governu nian atu halo medida prevensaun  efetivu iha ita nia sosiedade nia le’et, tanba ita haree katak atividade hotu tantu iha kapital iha Munisípiu, atividade hotu la’o normal, tanba ema laiha ona konsiensia no la preokupa ona kona-ba COVID-19, no la toman ona moris iha ijiene fase liman, distansiamentu fí0ziku, uza máskara no seluk tan, ne’e laiha tiha ona, ida ne’e mak dezafiu ida ba ita”,akresenta Daniel.

Tuir  Daniel katak, medida ne’ebé efetivu maka tenke halo tuir  rekomendasaun ne’ebé Organizasaun Mundial Saúde fó, no mos Ministériu Saúde produs. Katak, bele ajuda, tanba kilat ida forsa liu fo resposta ba COVID-19 ne’e mak prevensaun ne’e.

“Tanba ne’e mak ita hanoin katak, Estadu liu-liu Governu tenke halo atuasaun sériu ne’e mak kontrola pontu entrada, kuarentena sira obrigatóriu la bele autokuarentena, kria regra administrativu ne’ebé rigorozu atu obriga ita-nia sidadaun sira bele kumpri, no mos halo edukasaun sensibilizasaun  ba ita-nia komunidade oinsa atu halo antesipasaun ba prevensaun COVID-19. Agora iha parte seluk mak ita hanoin  katak, ho estadu Emerjénsia ne’e hanesan buat ida ita deklara maibe laran mamuk deit, maibe estadu Emerjénsia iha maibe  tenke iha regra ida ne’ebé iha”,esklarese Líder másimu FONGTIL ne’e.

Nia fundamenta, liu liu entidade sira hanesan Ministériu Saúde, Funsaun Públika,  depois  Ministériu hotu hotu iha edukasaun, hotu hotu tenki halo servisu kontribui maka’as ba iha atividade prevensaun ne’e, tanba iha Timor iha fatin Públiku, hanesan merkadu, igreja, iha ne’eba regra nunka la’o. Oly