Governu presiza fó insentivu agrikultór sira

Diretór Ezekutivu Forum Organizasaun Naun Governamentál (FONGTIL), Daniel Santos do Carmo hateten, Governu labele hatoman populasaun depende de’it ba subsídiu osan (USD 100) ba kada uma ka’in, maibé presiza medidas seluk, hanesan fó insentivu ba agrikultór sira, hodi produz ai-han lokál iha rai laran.

Alénde ne’e, presiza promove mós turízmu lokál iha Timor-Leste, ne’ebé bele atrai turísta sira, hodi kontribui ba roda ekonomia.

“Subsídiu ne’e pontu pozitivu, tanba bele intensiva ita nia komunidade sira ninia kapasidade atu sosa ai-han ho nutritivu, hodi responde ba situasaun COVID-19, ita hanoin katak ida ne’e naton ona ba subsídiu ne’ebé Governu fó ba insentiva ba ita nia populasaun sira, medidas sira ne’e di’ak apoiu ita nia populasaun, maibé medida ida hanesan ne’e labele atu kontinua, ne’e bele hatoman ita ninia populasaun atu dependénsia, maibé ita bele promove medida seluk, medida seluk mak oinsa mak fó subsídiu ba sira atu halo to’os, Ministériu Agrikultura no Peska (MAP) oinsa mak atu hadia irigasaun ho eskala ki’ik, irigasaun ki’ik sira atu bele to’o iha aldeia to’o iha suku atu fornese bee ba komunidade, hodi bele kuda ai-han ho variedade oi-oin, nune’e ita labele dependénsia ba foos, medidas seluk mak oinsa Governu atu promove sosa produtu ita nia populasaun ni’an hanesan batar, atu nune’e bele hatama iha loja agrikultura no mós bele rezerva ai-han iha CLN, medida seluk mak oinsa atu promove turizmu komunitária ka ekoturizmu”, Diretór Ezekutivu FONGTIL ne’e ba GMN iha ninia kna’ar fatin Caicoli-Díli, Segunda (21/09/2020).

Daniel esplika, Governu mós la presiza sosa foos husi estranjeiru, maibé presiza kria mekanizmu seluk, hodi ajuda agrikultor sira, hasa’e sia nia produsaun lokál.

Antes ne’e, Governu implementa subsídiu família USD 200 ba kada uma kain durante implementasaun Estadu Emerjénsia (EE) ba fulan rua ni’an iha periódu transmisaun surtu COVID-19 iha Timor-Leste. Ina