Hetan ameasa, RNDJK hasoru PNTL adia manifestasaun

Porta-Voz Grupu Rezisténsia  Nasionál Defende Justisa no Konstituisaun (RNDJK) RDTL, Ângela Freitas ho nia ekipa, Kuarta (2/9/2020), halo enkontru ho Komandante operasionál Polísia Nasional Timor-Leste (PNTL), Superintendente Xefe Pedro Belo, hodi muda fali data ba hala’o manifestasaun. Tanba grupu refere hateten, sira hetan ameasa no intimidasaun husi FALINTIL-Forsa Defeza Timor-Leste (F-FDTL).

Tuir pozisaun husi Polísia Nasionál Timor-Leste (PNTL) ni’an kontinua autoriza Grupu RNDJK RDTL halo manifestasaun. Maibé hafoin grupu F-FDTL halo serku ba Ângela Freitas nia rezidénsia iha Tersa (01/09/20), mak grupu RNDJK ba hato’o fali pedidu atu adia halo manifestasaun. Tanba tuir grupu RNDJK katak, sira lakohi povu hetan intimidasaun husi F-FDTL hanesan liman kroat povu ni’an.

Porta-Voz PNTL, Superintendente Xefe Arnaldo Araújo, hateten, PNTL autoriza nafatin Grupu RNDJK RDTL  halo manifestasaun.  Maibé grupu refere rasik mak deside adia fila-fali sira-nia data manifestasaun.

“Ami koalia kona-bá kestaun manifestasaun, maibé tanba de’it kestaun seguransa  iha rai-laran, ho ida ne’e sira rasik husu atu adia fila-fali, la hatene bainhira mak atu komesa fila-fali, depois mak sira mai hasoru fali Polísia kona-bá sira-nia aktividade atu halo manifestasaun”, esplika Superintendente Xefe Arnaldo Araújo.

Iha parte seluk, Porta-Voz RNDJK, Ângela Freitas, hateten, sira nia parte adia hikas demonstrasaun ka manifestasaun hodi la konkorda ho desizaun inkonstitusionál ne’ebé Prezidente Repúblika (PR) halo iha rai ne’ebé adopta Estadu Direitu demokrátiku ne’e, tanba konsiente katak hetan presaun husi F-FDTL.

“Sim ida ne’e halo pániku ita nia populasaun, ita labele mai ho situasuan agora ita bele provoka forsa hasoru polísia no polísia hasoru forsa, ami tetu haree katak situasuan ne’e labele hasai dezisaun ho emosionál, atu nune’e povu labele sai vítima ba kilat RDTL, horiseik forsa mai serku tiha rezidénsia  ho kilat boot ita hatene katak iha artigu 49 númeru 2 intervensaun militár tenke tuir regras no lei, labele halo konforme ita nia hakarak, ita labele aplika forsa militár ameasa fali sidadaun espresa nia hanoin liu husi demonstrasaun pasífiku”, dehan Porta-Voz RNDJK-RDTL, Ángela Freitas liu husi Konferénsia ba Imprensa iha Bairo Formosa-Díli, Kuarta (09-02-2020).

Porta-Voz ne’e mós esplika, tuir lei ne’ebé iha Polisia Nasional Timor-Leste (PNTL) mak iha responsabilidade tomak hodi halo atuasaun hasoru manifestasaun husi grupu ruma la’ós F-FDTL.

Nia garante maske hetan presaun, maibé sei kontinua halibur sidadaun sira hodi halo demostrasaun, tanba hakarak kontinua defende Konstituisaun RDTL.

“Asaun ne’e sei kontinua realiza, maibé data mak mudansa, tanba saída mak akontese horiseik intervensaun militár ne’ebé fó intimidasaun ba partisipasaun massa ne’ebé atu tun, ida ne’e ami sei tetu no mós muda data ida ne’e atu nune’e ita hamutuk bele kria ambiente ne’ebé paz trankulidade, tanba massa ne’ebé atu tun mai ho marsa pasífiku ne’ebé atu hato’o nia ezijénsia ba Prezidente Repúblika (PR) ita hotu hatene katak ne’e violasaun konstituisaun, maibé haree katak sei iha nafatin vijilánsia husi forsa prejudika sidadaun sira ne’e organizadu husi sidadaun munisípiu 13”, esplika nia.

Ángela mós komenta tan katak ninia grupu atu halo manifestasaun ne’e prepara ona petisaun hasoru PR ne’ebé ezije ba Xefe Estadu ne’e atu rezigna-an.

Tuir lei konstituisaun RDTL artigu 147 hateten, misaun PNTL mak atu garante seguransa interna, liu-liu manifestasaun boot ruma no  atende problema sira akontese mosu iha rai-laran.

No artigu 146 hateten, misaun F-FDTL mak  atu asegura ameasa esterna husi tasi, lalehan no rai-maran. avi/ida