Prosesu konstrusaun Igreja Ai-Mutin ladauk finaliza

Membru Komisaun harii Igreja foun no Responsabel Konsultór Igreja Ai-Mutin, Cesar Vital Moreira, hateten, konstrusaun Igreja Parokia São José Ai-Mutin seidauk bele finaliza, tanba hasoru problema finanseiru.

“Ami atrapalla tebes ho konstrusaun Igreja foun ne’e, tanba ami-nia proposta ne’ebé tama ba Ajénsia Dezenvolvimentu Nasionál (ADN) dezde inísiu hamutuk 4,8 Millhoes (tokon) depois de sira halo avaliasaun fó duni osan ida ne’e no quer dizer osan ida ne’e mak Bill of Bill of Quantity (BoQ) nia leten, maibé depois mai ami simu de’it 3 Milhoes, entaun simu de’it 62%, hela 38%, agora servisu ida ne’e la’o atraza”, Membru Komisaun harii Igreja foun no Responsabel Konsultór Igreja Ai-Mutin ba GMN iha Igreja Ai-Mutin, Tersa (01-09-2020).

Cesar esplika, impaktu seluk ne’ebé afeta ba konstrusaun Igreja ne’e mak Governu hasoru impase polítika no la’o ho orsamentu duodesimu, inklui situasaun COVID-19.

“Ami buka dalan hodi hetan apoiu presiza 1.8, maibé 1.5 mós to’o ona, tanba agora ami halo hela poupansa 9% no osan ne’e mak ami uza halo finishing, sarani sira hotu husi parokia ne’e no parokia seluk, ida ne’e mak ajuda ami la’o nafatin maske nei-neik”, tenik Membru Komisaun harii Igreja foun no Responsabel Konsultór Igreja Ai-Mutin ne’e.

Tuir loloos konstrusaun Igreja ne’e bele finaliza ona bainhira Governu aloka orsamentu ho montante USD tokon 4 resin, tuir duni proposta iha BOQ, maibé realidade Governu aloka de’it orsamentu ho montante USD tokon 3, nune’e seidauk bele finaliza konstrusaun refere.

Igreja Parokia São Jose Ai-Mutin ne’e rasik ho nia luan metru 5167 kuadradu no sei akumula sarani kuaze 1500.

Igreja ne’e rasik iha basement ho multifunsaun atu bele kria kartóriu parokia, biblioteka Igreja, loja, kapela no aula hodi halibur joven sira atu partisipa iha atividade Igreja nini’an.

Entretantu Igreja Ai-Mutin hahú ona nia faze konstrusaun iha tinan 2016 no hetan ona apoiu husi sarani Parokia São Jose Ai-Mutin, inklui parokia seluk ni’an hamutuk USD 50.000. ida