SEKOMS: Televizaun nasionál tenke fasilita lian jestuál

Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, husu ba média televizaun nasionál hotu atu bele fasilita ema ho defisiénsia tilun bele asesu informasaun ho lian jestuál.

“Ha’u husu para GMN mós bele fó atensaun TVE, GARDAMOR TV ho média seluk, husu para sira fó espasu ba maluk defisiente sira, liu-liu fasilita maluk sira hodi hetan informasaun ho lian jestuál iha média sira, ha’u husu para média sira konsidera prioridade”, SEKOMS ne’e hafoin halo atribuisaun sertifikadu ba formandu na’in 10 iha programa lian jestuál iha Klibur Defisiénsia Tilun Timor-Leste (KDT-TL), Sesta (18-09-2020).

Governante ne’e akresenta, média nasionál hotu tenke apoiu hodi fasilita, tanba dau-daun ne’e númeru ema ho defisiénsia iha teritóriu laran tomak kuaze rihun 12.

Governu rasik mós iha ona planu harii Rádio Komunidade ba ema ho defisiénsia.

“Tinan oin ita bele estabelese ona rádio komunidade ida espesiál ba sira no husu ba sira atu sira mak tenke lidera, sira mak tenke jere, jornalista tenke mai husi sira, tanba sira iha kapasidade oin-oin ne’ebé durante ne’e sira aprende no SEKOMS mós apoia, ami fiar bainhira rádio oferese ne’e funsiona sira mak sei sai na’in no jestór, Governu sei akompaña de’it”, tenik Akara.

Governu mós prevé ona orsamentu ba tinan 2020 liu husi transferénsia públika ho totál rihun 240, hodi apoiu rádio komunidade, inklui harii rádio ba ema ho defisiénsia. ida