Xanana-Horta inaugura uma-lulik haat iha Haurema

Líder karismátiku Kay Rala Xanana Gusmão, hamutuk ho premiadu Nobel da Paz, José Ramos Horta, inaugura uma-lisan haat hanesan, Uma Bermeta, Uma Lekibela, Uma Aculebelior no Uma Salala, husi família Haurema, Atsabe.

Xanana Gusmão hateten, inaugurasaun ba uma-lisan ne’e importante, tanba ema ida-idak bele buka hatene ninia lisan rasik, hodi harii dame no unidade ba nasaun.

“Ita-nia fatuk ho rai, ita nia bee ho ahi-ita fiar mós. Hakarak hatutan tan katak, unidade ne’ebé imi haburas iha ne’e ba konstrusaun uma ida ne’e, hametin tan, haburas, hametin nakloke tan, hodi ita hotu bele partisipa iha konstrusaun Estadu no konstrusaun nasaun”, hatete Líder Nasionál ne’e iha serimónia inaugurasaun Uma-lulik lisan haat, iha Atsabe-Ermera, Sábadu (19-09-2020).

Superiór husi uma-lisan Jacinto Rigoberto, agradese ba prezensa eis-komandante em chefe, Xanana Gusmão no eis Prezidente Repúblika, José Ramos Horta, tanba bele motiva família boot lisan haat ne’e, atu harii unidade hahú husi uma-lisan.

“Dala ida tan, lori família boot nia naran hakarak hato’o ami-nia agradesimentu wa’in ba maun boot na’in rua. Lisan ne’e forte, tan ho lisan mak ita iha abut, ita mak laiha lisan, ita la’ós Timor-Oan, ida ne’e mak ami nia prinsípiu”, termina Lia Na’in ne’e.

Entretantu uma-lisan haat ne’e lokaliza iha Haurema, suku Malabe, postu administrativu Atsabe, munisípiu Ermera, kompostu hosi maun-alin na’in 10.

Inaugurasaun ne’e rasik ofisialmente tesi fita husi José Ramos Horta no asina plaka husi Kay Rala Xanana Gusmão, no hetan bensaun husi Padre Arnaldo Ferderico de Deus. san