Xanana husu juventude sira hatutan istória libertasaun nasionál

Líder karismátiku, Kay Rala Xanana Gusmão, husu ba juventude sira tomak atu hatutan istória libertasaun nasionál ninian ne’ebé liu husi terus no susar.

Xanana Gusmão hato’o lia hirak ne’e iha suku Holarua, Postu Administrativu Same, Munisípiu Manufahi, Tersa (22/9/2020).

Xanana enkoraza juventude iha suku refere atu buka hatene kona-bá istória libertasaun, ho nune’e istória labele lakon leet de’it.

“Joven sira tenke buka hatene istória ita nian no hatutan, liu-liu inan-aman sira terus, terus tebes”, dehan Xanana.

Hanesan mós iha fatin barak Xanana husu nafatin ba joven sira tenke respeita inan ho aman, tanba ho inan-aman nia terus ohin loron Timor-Leste hetan ukun rasik-an.

“Hodi sira-nia terus, sira-nia sakrifísiu iha tinan 24 nia laran mak ita foin hetan ukun-an ne’e, sira lakohi terus, ita la hetan ukun-an”, dehan tan Xanana.

Iha biban ne’e, eis komandante em Xefe FALINTIL, Kay Rala Xanana Gusmão hamutuk ho ferik katuas sira dahur hamutuk. GMN