Amu Ilídio Correia hakotu iis iha HNGV

Diretór Komunidade Post-Novisiadu, Salezianu Comoro, nu’udár mós manorin iha Institutu Filosófia São Francisco Sales Comoro, Padre Ilídio Eduardo do Rosário Correia, SDB, hakotu iis iha Hospital Nacional Guido Valadares (HNGV) mais ou menus tuku 10 ho balun, Domingo ne’e.

Tuir Katekista iha Parokia Nossa Senhora Maria Auxiliadora, Comoro, Francisco Ximenes, Amu Ilidio prezide hela missa ba daruak nian, iha Domingo mais ou menus tuku 09.00 dadeer.

“Nia hamri’ik iha ne’ebá hodi be ‘hodi padre’ hotu tiha, nia nono’ok kleur tiha, hotu tiha nia kala sente ba kma’an uitoan nia lee fali ema nia tinan ne’e envelope tolu, pois ida terahkir ne’e nia para tiha kala sekitar 20 minutos ida henesan ne’e, nia ko’alia tan liafuan ida hakribi sala ne’e, entaun nia hamri’ik loos no nono’ok de’it, kala 20 minutos ida hanesan ne’e sira bara-barak haksoit sa’e ba kaer nia, ne’e nia mamar tun de’it ona. No sarani sira mak sa’e ba kous nia tun mai hodi lori ba HNGV. La kleur mak amu Boi mak halo fali missa ketiga ne’e, depois amu João telefone fali mai mestre Armando hodi dehan Amu Ilídio laiha ona, fila ona ba Aman Maromak”, Katekista iha Parokia Nossa Senhora Maria Auxiliadora, Comoro ba GMN iha Parókia Comoro, Domingu, (18/10/2020).

Hafoin akontese, sarani sira evakua kedas matebian (Padre Ilídio) ba HNGV, mais ou menus tuku 9 ho balun, maibé doutór sira la konsege salva nia vida.

Padre Ilídio Correia moris iha postu administrativu Vemasse, munisípiu Baucau, iha loron 13, fulan Outubru, tinan 1970.

Iha loron 13, fulan Outubru liu bá hamutuk ho padre no estudante Institutu Filozófia Francisco Sales Comoro, matebian sei selebra nia tinan ba dala 50.

Entretantu GMN tenta halo konfirmasaun ho médiku, iha sala emerjénsia HNGV, maibé parte refere seidauk bele hato’o informasaun ruma kona-bá moras ne’ebé Amu Ilidio enfrenta. san