FADA-TALATA realiza konferénsia direitu saúde reprodutiva

Atu hasa’e konsénsia públiku hodi evita hanoin kaben-sedu no isin-rua sedu, Asosiasaun Feto Asaun Dezenvolvimentu Aileu (FADA) ho Organizasaun Tane Luta ba Transparénsia (TALATA) realiza konferénsia direitu saúde reprodutiva.

“Relasiona ho konteúdu atu redus kaben-sedu ou isin-rua sedu, atividade barak mak ita halo ona, dezamina informasaun kona-bá saúde reprodutivu, ita mós halo konferénsia ita halo workshop no mós dialogu ho inan-aman estudante no labarik juventude sira kona-bá sira-nia saúde reprodutiva rasik atu sira bele hatene di-di’ak kona-bá sira-nia saúde nune’e sira bele halo intervensaun ba sira-nia-an rasik, hodi bele kuidadu atu bele hadook-an husi moras no husi tentasaun sira ne’ebé agora kaben-sedu isin-rua sedu ne’e aas”, Manajer projetu FADA, Agustinha Gomes Madeira ba GMN iha Aileu Segunda (26-10-2020).

Tuir nia, FADA ho TALATA servisu hamutuk ho parseiru relevante no apoiu husi Plan International, hodi realiza konferénsia direitu saúde reprodutiva ho tema “Ema Hotu-Hotu iha Direitu ba Asesu Servisu Saúde Reprodutiva ne’ebé Hanesan, liu-liu Adolesente Feto No Foinsa’e No Feto Sira iha Rural”.

“Liu husi konferénsia ne’e bele hasa’e mós foinsa’e no komunidade nia hanoin kona-bá freedom online ba labarik feto sira atu prevene asédiu no abuzu online. Problema kona-bá kaben-sedu nu’udár problema sosiál ne’ebé ema hotu preokupa, iha ne’ebé nia konsekuénsia mak adolensente sira liu-liu feto tenke lakon oportunidade eskola, problema ba sira-nia saúde, inklui hamosu problema sosiál sira seluk, hanesan soe-bebe no mós mosu iha dezigualdade jéneru rasik iha família no sosiedade”, tenik Agustinha.

Iha fatin hanesan Influencing Manager Plan International, Laura Lopes, hateten, Plan nia misaun iha Timor-Leste, hanesan organizasaun ne’ebé servisu ba direitu labarik no intervensaun iha terenu bazeia nafatin ba meta ne’ebé iha ona.

“Ami hamutuk ho parseiru atu kontinua kria espasu halo promosaun fasilita empoderamentu atu labarik feto no feto sira iha kbi’it partisipa ho kualidade iha prosesu hotu, inklui prosesu foti desizaun ba sira-nia saúde reprodutiva ho loloos no sira-nia saúde produtiva ba sira-nia saúde ho loloos”, tenik Laura. 

Konferénsia loron ida ne’e, halibur oradór sira mai husi nasionál no munisípiu Aileu, konferénsia ne’e hodi komemora loron internasionál ba feto no mós loron feto rural.

Partisipa iha konferénsia ne’e, reprezentante Administradór munisípiu Aileu, Komandante PNTL, estudante, inklui foinsa’e munisípiu Aileu. Iha konferénsia ne’e mós juventude husi postu administrativu Lequidoe hatudu drama kona-bá inan-aman sira la fó importánsia ba oan feto atu eskola. eni