SEPC organiza kuda Ai-Parapa 700 iha Ulmera

Selebra loron Mundial  ba Redusaun Risku Dezastre, Sektretaria Estadu Protesaun Sivíl (SEPC-sigla Portugés), organiza atividade kuda Ai-Parapa oan iha Munisípiu Liquiça. Atividade ne’e hala’o iha tasi ibun Ulmera, Kinta (8/10/2020).

Hafoin kuda Ai-Parapa Sekretáriu Estadu Protesaun Sivíl, Joaquim José Gusmão, hateten, atividade kuda ai-parapa oan ne’e hodi selebra loron mundial ba Redusaun Risku Dazastre Naturais iha Timor-Leste.

“Atividade kuda ai-parapa ne’e SEPC servisu hamutuk ho ONG ASER-TL inklui Sekretaria Estadu Peskas no Meiu-Ambiente hodi komemora loron mundial ba Redusaun Risku Dazastre naturais ne’ebé sei monu iha loron 13, fulan Outobru, ne’e ho nia tema ‘Governansaun ne’ebé di’ak ba Redusaun Risku Dezastre’. Antes ne’e ita halo ona atividade workshop no iha loron 9 to’o loron 13 sei kontinua halo Doasaun ran no simulasaun iha Bidau Santana”,hateten Joaquim José Gusmão  ba GMN iha Ulmera, hafoin kuada ai-oan ne’e.

Joaquim mos konsidera importante tebes atu kuda Ai-Parapa iha areia tasi ibun nian nune ambiente iha areia tasi ibun kontinua furak .

 “Ita kuda Ai-Parapa iha fatin ne’e tanba ita servisu hamutuk ho ONG ASER-TL hodi organiza komunidade no estudante sira hodi kuda iha areia tasi ibun parte Ulmera nian hamutuk 700 hodi halo konservasaun ba fatin ida ne’e nune ambiente iha areia tasi ibun kontinua fresku bei-beik.no sei koordena ho Autoridade Lokal sira atu bele tau matan ba Ai oan ne’ebé ita kuda tiha ona nune’e Ai-oan ne’e bele moris ho di’ak”,informa Joaquim.

Koordenadór NGO ASER-TL, Carlos Gonçalves, haktuir, atividade kuda ai-Parapa ne’e importante tebes hodi konserva área protezidu sira iha tasi ibun.

“Atividade ne’e hala’o tanba hetan apoiu fundu husi  parseiru husi Estadu Unidu Amérika no parseiru sira seluk ho montante dolar amerikanu rihun rua no atividade ida ne’e hetan partisipasaun husi Sekretariu Estadu Meiu-Ambiente, Sekretariu Estadu Peskas, no Autoridade Lokal inklui  estudante sira”,katak Carlos.aba