Toilet nakfila ba eskritóriu profesór ETV Raikala Letefoho

Diretór Eskola Téknika Vokasionál (ETV) Raikala Letefoho, Zeca Martins Maia, subliña, durante ne’e profesór sira iha Ensinu Vokasionál Letefoho uza de’it Toilet (hariis-fatin-red) sai eskritóriu profesór nian, tanba laiha sala de aula.

“Ita haree kondisaun ita labele uza, entaun ita uza eskritóriu hariis-fatin ou toilet ba eskritóriu, toilet ita halo fali iha liur, iha laran ita uza fali ba eskritóriu hanesan ha’u nia Xefe Gabinete ho Adjuntu bele uza fatin refere“, Diretór ETV Raikala Letefoho ne’e ba GMN iha Letefoho, munisípiu Ermera, Kuarta (14-10-2020).

Zeca afirma, maske sira uza deit toilet sai eskritóriu ba profesór sira, maibé sira kontinua iha vontade hodi hala’o servisu.

Relasiona ho situasaun ne’e, Dirijente eskola ETV Raikala Letefoho hato’o ona proposta ba Ministériu Edukasaun (ME), maibé ladauk iha solusaun.

“Maske enfrenta situasaun refere, maibé prosesu aprendijazen kontinua la’o normál. Ami komprende durante ne’e ita laiha orsamentu, ami hanoin katak ministériu seidauk iha osan mak seidauk iha planu, ami espera iha tinan 2021 ita-nia ME bele mai“, tenik Diretór ETV Raikala Letefoho ne’e.

Hatán ba preokupasaun hirak ne’e, Prezidente komisaun G Parlamentu Nasionál (PN), António Verdial, hateten, kestaun ne’e sira sei hato’o ba ME, hodi buka solusaun.

“Ho preokupasaun ne’e ami presiza ita boot sira-nia relatóriu eskrita ho ita boot sira-nia relatóriu sei la monu iha dalan”, tenik António.

ETV Raikala Letefoho foin hamri’ik iha tinan 2013 no iha tinan 2016 servisu hamutuk ho Ensinu Báziku Letefoho, nune’e oferese fatin refere ba ETV Raikala Letefoho.

Entretantu totál estudante ETV Raikala Letefoho hamutuk na’in 189, profesór kontratu na’in hitu (7) no na’in tolu tolu (3) Eskola Ensinu Báziku ni’an. ety