WFP simu premiu Nobel da Paz husi ONU

Diretór World Food Programme (WFP), Dageng Liu, hatete, sira haksolok tebes, tanba Organizasaun Nasaun Unidas (ONU) valoriza ona sira nia servisu ne’ebé  durante ne’e sira halo liu husi fó premiu Nobel da Paz ba sira.

“Hanesan ita bo’ot sira hatene katak iha Sesta kalan liu ba iha oras Timor ninian, ami hanesan WFP sente onra tebes, i depois sente ho haraik-an, simu premiu kona-ba Nobel da Paz nian”, Diretór WFP ne’e ba jornalista sira, Segunda (12/10/2020), iha edifísiu WFP iha Caicoli-Díli.

Dageng esplika, liu husi servisu maka’as husi ekipa WFP hotu iha mundu, liu-liu esforsu hodi buka no fó tulun ba vítima hotu iha mundu ne’ebé sofre, tanba la hetan ai-han.

“Rekoñesimentu ida ne’e ba hanesan funsionáriu WFP tomak ne’ebé mak tau sira nia vida, iha liña de servisu i depois loron hodi fó hahan fó asisténsia ba ema liu-liu labarik sira ba inan sira, ema hotu-hotu mane sira iha mundu tomak”, tenik Diretór WFP ne’e.

Nia mós salienta, WFP hala’o ona ninia servisu iha tinan barak no konsege fó tulun ona ema lubun ona iha mundu ne’e, liu-liu bainhira hasoru situasaun krize ai-han.

“Globalmente molok WFP sira fó han ema maioria tokon atus ida ba nasaun 84, depois de COVID ne’e mosu WFP fó han ema tokon ida tolu nulu resin walu depois hanesan mós hamlaha nian, ne’eba hatete katak ema tokon atus neen sia nulu bainhira  sira ba toba ho kondisaun hamlaha”, tenik Dageng.

Entretantu Diretór WFP iha Timor-Leste ne’e agradese mós ba  parseiru nasionál sira, liu-liu Governu Timor-Leste nia suporta durante ne’e. Jen