JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Xanana: Estadu ladún tau matan ba ferik-katuas sira

Xanana: Estadu ladún tau matan ba ferik-katuas sira

Líder nasionál Kay Rala Xanana Gusmão, hatete, Estadu ladún tau matan ba ferik ho katuas sira, maske balun simu osan subvensaun idozu husi Governu. Tanba tuir Xanana, ferik no katuas sira mak sai hanesan eroi ba luta libertasaun nasionál.

“Tanba tuir ami na’in rua avó Horta haree katak Estadu ladún tau matan (ferik no katuas sira) balu kala simu osan idozu, maibé la’ós hotu-hotu. Todan ne’ebé lori iha tinan 24 funu nia laran barak sei lori hela, antes atu ba liu ne’e mak ami halo hela movimentu síviku ida atu husu ba Estadu hodi tau matan ferik ho katuas sira, tanba imi mak liberta ita-nia rai, ita la duni inimigu, la duni ho kilat, imi mak duni ho pregu, pregu ne’e signifika ruin ne’ebé mate iha ita-nia sorin husik de’it, ruin sira ne’e mak duni sai inimigu. Tanba ne’e ami promete ami sei book hodi Estadu tau matan ba imi iha tempu ikus ona imi moris hamutuk ho ami”, hateten Xanana iha Sábadu (24-10-2020), banhira ho eis Prezidente Repúblika, José Ramos Horta, halo asaun karidade iha suku Laikore, postu administrativu Laclo, munisípiu Manatuto.

Xanana dehan, sei halo nafatin movimentu síviku liu husi asaun karidade ne’ebé dau-daun ne’e halo, atu husu ba Estadu hodi tau matan ba ferik ho katuas sira, tanba ferik no katuas sira mak liberta Timor-Leste husi okupasaun invazór sira, la’ós ho kilat.

 “Ne’e duni ho respeitu tomak ba imi, avó Horta ho ha’u mai to’o iha ne’e atu hakru’uk ba imi. Tanba imi mak liberta ita-nia rai ho imi-nia terus tinan 24 nia laran imi simu terus hotu-hotu mas imi la reziste”, deha líder nasionál ne’e.

Sasan nesesidade bázika ne’ebé mak líder nasionál rua ne’e fahe mak hanesan foos, mina no seluk tan ba katuas no ferik sira iha suku Laikore ne’ebé apoia husi emprezáriu Laclo-oan.

Entrentantu, laureadu nobel ba paz, José Ramos Horta, agradese ba populasaun suku Laikore, tanba simu ona nia ho eis komandante FALINTIL, Kay Rala Xanana Gusmão.

“Ho difikuldade ne’ebé maka imi iha, iha tempu ida ne’e ami hatene Timor-Leste tomak ekonomia ladun la’o. Tanba razaun barak, la’ós de’it tamba COVID-19 no razaun seluk tan hotu-hotu setor privadu iha difikuldade oi-oin. Maibé imi halo esforsu para simu avó Xanana no ha’u rasik iha ne’e”, dehan Horta.

Husu joven sira estuda dezenvolve TL

Nune’e mós líder nasionál, Kay Rala Xanana Gusmão, husu joven sira atu estuda maka’as hodi valoriza ferik no katuas sira-nia luta ba ukun rasik-an no dezelvolve Timor-Leste iha futuru.

Eis komandante em xefe FALINTIL, Kay Rala  Xanana Gusmão, hatete, estabilidade nasaun nian iha joven sira-nia liman, tanba joven sira sei garante Timor-Leste nian iha futuru, la’ós ema seluk. Tanba ne’e, pioneiru ba organizasaun G7+ Xanana Gusmão, husu joven sira atu labele baku malu hodi hatun ferik no katuas sira ne’ebé uluk luta ba ukun-an nia dignidade.

“Joven sira, liu-liu sira ne’ebé mai husi universidade sira, imi tenke estuda maka’as.Tuir avó feto no mane sira nia dalan, la’ós imi atu sa’e fali foho. Tanba imi barak moris iha ukun-an nia laran, imi hanoin katak agora mak imi terus, imi la terus ida, kompara ho ferik no katuas sira. Ne’e duni eforsa-an ba, tanba sira no ami hotu atu ba ona. Sé mak atu kaer rai ida ne’e? imi mak sei kaer. Imi mak sei kore husi mukit ho kiak. Labele hanoin katak agora ne’e tenke rezolve problema hotu-hotu, imi prepara-an atu fó valor ba terus tinan 24 nia laran ferik ho katuas sira halo”, líder nasionál ne’e iha Laikore, postu administrativu Laclo, munisípiu Manatuto.

Xanana husu mós ba joven sira atu tau iha ulun katak futuru nasaun nian iha sira-nia liman no joven sira mak sei rezolve problema ne’ebé maka oras ne’e nasaun hasoru. Líder nasionál iha esperansa katak, ho joven ne’ebé matenek sei lori mudansa ba nasaun iha futuru.

“Ne’e duni labele haluha imi atu valoriza sira nia sakrifísiu esforsu-an loro-loron, feto la’ós ba pinta ibun tun-sa’e no mane sira ba tesik arbiru de’it. Problema sim, iha, maibé problema ida agora sei la to’o ba problema ne’ebé ferik ho katuas sira simu iha funu nia laran. Katuas sira dehan, kotuk soe ba kotuk haree ba oin, maibé imi labele dehan kotuk so’e ba kotuk. Tanba husi pasadu terus ferik no katuas sira nian ne’e mak ohin loron imi hatais hanesan ne’e”, dehan líder nasionál ne’e.

Iha vizita ba suku Laikore ne’e ekipa Xanana fahe mós sasan desportu sira hanesan farda futebol, bola ba juventude sira iha suku haat, iha postu adminisrtativu Laclo. oct

Lee hotu :   Sinto Kulau rejeita lansa isu Lorosa’e no Loromonu

Add to Comments Here!!!!

error: Content is protected.
Secured By miniOrange
You might also like:
Governu presiza hadia infraestrutura EBF Buibau

Koordenadór eskola Ensinu Báziku Filial (EBF)...

Kazu omisídiu iha Liquiça sei iha prosesu autópsia iha HNGV

FOTO: MedSos Kazu omisídiu ne’ebé akontese...

SEMB: MEJD nia apoiu material ba EBF Darenafa la sufisiente

Diretór Servisu Edukasaun Munisípiu Baucau (SEMB),...

Close