JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

FM konsidera la nesesáriu implementa militár obrigatóriu

FM konsidera la nesesáriu implementa militár obrigatóriu

Organizasaun Naun Govermentál Fundasaun Mahein (FM) la aseita Governu implementa militár obrigatóriu, tanba konsidera la nesesáriu implementa iha Timor-Leste.

“Istórikamente militár obrigatóriu ne’e hahú diskute no pasa iha lei ne’e iha tinan 2007, ne’ebé iha altura ne’ebá situasaun rai-laran la permite atu implementa militár obrigatóriu iha Timor-Leste no haree sei hatodan mós  ita-nia despeza, entaun liu de’it tinan 2008 lei ne’e altera tiha ou halo kedas revizaun. Depois ita akompaña militár obrigatóriu hanesan ambisaun ou mehi ida mós husi Primeiru Ministru atuál dezde tinan 2007. Tanba ne’e mak to’o iha tinan 2012 iha kampaña prezidénsiál, hahú kedas promosaun  promove militár obrigatóriu sai hanesan programa prioridade kampaña prezidénsiál iha altura ne’ebá. Tanba ne’e to’o iha tinan 2013 mosu  diskusaun kona-bá militár obrigatóriu iha Timor-Leste no primeiru ita haree katak, programa ida ne’e hanesan ambisaun ida ne’ebé Timor-Leste hakarak implementa, maibé FM nia haree la nesesáriu, tanba primeiru iha ámbitu estratéjiku nian ita tenke halo uluk análiza liga ho ameasa  interese Estadu nian. Agora ita implementa programa ida ne’e, ita mukit iha análiza  sira hanesan ne’e. Segundu implementa militár obrigatóriu sei hatodan de’it despeza Estadu”, Diretór Ezekutivu FM, João Almeida ba GMN iha ninia kna’ar fatin Fomento-Díli, Segunda (09/11/2020).

Enkuantu Governu aprova ona dekretu lei foun hodi regula servisu militár iha loron 28, fulan Outubru, tinan ne’e, liu husi reuniaun Konsellu Ministru (KM), ne’ebé aprezenta husi Ministru Defeza, Filomeno Paixão.

FM la aseita PCIC kaer kilat

Organizasaun Naun Govermentál Fundasaun Mahein (FM) la aseita membru Polícia Científica de Investigação Criminal (PCIC) kaer kilat, tanba tauk la konsege kontrola utilizasaun arma refere, halo sidadaun sira mak sai fali vítima.

“PCIC ninian ne’e karik ita boot sira akompaña desde kriasaun PCIC FM la aseita ho kriasaun instituisaun ne’e rasik. Primeiru ita dupla de’it instituisaun sira ne’ebé eziste ona, por que PCIC mai enves de haree buat foun seluk ne’ebé instituisaun seluk seidauk halo, maibé repete de’it saída mak instituisaun seluk eziste ona hanesan Polísia Nasionál Timor-Leste (PNTL) halo tiha ona. Segundu ho kriasaun PCIC hanesan dupla de’it kompeténsia ne’ebé iha, hatodan mós despeza Estadu ninian. Kuandu kriasaun PCIC iha ne’ebá define mós kilat sira sei lori husi membru investigadór sira, entaun iha altura ne’ebá FM la aseita ho kriasaun PCIC, maibé instituisaun ne’e kontinua harí no iha tinan 2017 aprova diploma ministeriál ida hodi aprova tipu kalibre ba PCIC, iha altura ne’ebá PCIC la aseita nafatin diploma ministeriál  ne’ebé aprova tipu kalibre ba PCIC, tanba ita-nia problema mak kontrolu arma, tanba ita-nia istória nakonu ho kilat, tanba ita la konsege kontrola  ninia utilizasaun, orsida sidadaun sira mak sai vítima ba buat sira ne’e hotu”, Diretór Ezekutivu FM, João Almeida ba JNDiário iha ninia kna’ar fatin Fomento-Díli, Segunda (09/11/2020).

Tuir Diretór Ezekutivu FM nia haree, ida ne’e bele husik hela Presedente la di’ak ba rai Timor, tanba instituisaun ki’ik boot tenke uza kilat.

“Tanba ita aprova ona ba PCIC, Komisaun Anti Korupsaun  (KAK) mós sei ezije. Ita hotu hatene KAK treinu ona arma tinan rua ou tolu liu ba. Alende treinu arma sira ki’ik, sira  mós treinu arma boot, hanesan kilat Staer. Ita hotu akompaña Guarda Prizionál mós ezije, Guarda Florestál mós ezije, Álfandega mós ezije karik servisu seluk liga ba risku, entaun sai presedente la di’ak. Ezije kilat, bainhira hotu-hotu lori kilat la konsege kontrola ida ne’e sei sai ameasa boot”, dehan João Almeida.

Maske FM la aseita, maibé arma ba PCIC ho marka Glock 19 to’o ona iha fulan Outubru, tinan ne’e.

Antes ne’e, Xefe Estadu Maiór F-FDTL, Majór Jenerál Lere Anan Timur, husu ba Governu atu kontrola arma ne’ebé PCIC sei uza, atu nune’e labele uza sala. avi

Lee hotu :   Surtu COVID-19 lori Xanana hakbesik povu

Add to Comments Here!!!!

error: Content is protected.
Secured By miniOrange
You might also like:
Fundu Petróleu sa’e ba billiaun USD 18,47

Tuir relatóriu trimestral Fundu Petrolíferu (FP)...

Tribunál deside fó tempu loron 10 ba Arkidioseze Díli rekolla fali relatóriu KJP

Liu husi desizaun ba prosesu sivíl...

Xanana agradese apoiu husi madre-estudante Canossa ba komunidade Remexio

Líder karismátiku Kay Rala Xanana Gusmão,...

Close