Júlio Crispim: Relatóriu KJP la’ós atu publika

Padre Júlio Crispim, hateten, relatóriu husi Komisaun Justísa no Paz (KJP) ne’ebé fó ba líder igreja Katóliku ne’e tuir irarkia uma kreda Katóliku no mós entrega ba líder nasionál ne’e hanesan aktu konsiderasaun ida nu’udár figura importante ba povu, la’ós publika relatóriu ne’e ba públiku.

“Iha faktu hatudu katak, Padre Herminio ne’e entrega ba Arsebispu Arkidioseze Díli no entrega ba maun boot Kay Rala Xanana Gusmão. Entrega ba sira-na’in rua ida ne’e nia problema mak ida ne’e, sai ba iha média sosiál ne’e sé mak lori sai? Sé mak publika? Padre Herminio entrega de’it, entrega la signifika nia publika, entrega ba Arsebispu Dioseze Díli entrega ba ema na’in rua, i aktu ida ne’e konsidera hanesan publikasaun ida ne’e ita kestiona. Entrega pesoál ema ida ba ema ida, ba ha’u ne’e la’ós aktu publikasaun. Entrega ne’e aktu pesoál, ne’e la’ós publikasaun i konsiderasaun i interpesoál, la’os institusionál”, Padre Júlio Crispim ba GMN iha ninia rezidénsia Praia dos Coqueiros-Díli, Tersa (03/11/2020).

Jurista ne’e husu mós ba Konsultóriu Justísa Sosiál tenke buka hatene autór ne’ebé publika relatóriu ne’e, tanba publikasaun ne’e la’ós aktu institusionál, maibé aktu pesoál.

Entretantu relasiona ho prosesu providénsia kautelár ne’ebé hato’o husi Justísa Sosiál (JU’S) nu’udár réu (terdakwa-red) hasoru Komisaun Justísa no Paz (KJP), tanba konsidera KJP la rai segredu, tanba simu tiha relatóriu kona-bá aktu violasaun iha uma mahon Topu Honis iha Rejiaun Administrativa Espesiál Oe-Cusse Ambeno (RAEOA), maibé entrega fali ba Arsebispu Metropolita Díli, Dom Virgílio do Carmo da Silva, SDB no líder nasionál Kay Rala Xanana Gusmão.

Antes ne’e, JU’S husu tribunál atu deside prosesu ho númeru rejistu NUC 0278/20 CV/TDD hodi rekolla fali relatóriu KJP ne’ebé espalla ona iha públiku, tanba konsidera hamonu naran di’ak no reputasaun JU’S nian.

Enkuantu iha loron 30, fulan Outubru, tinan ne’e, Tribunál Distritál Díli (TDD) rona ona sasin Kay Rala Xanana Gusmão no Padre Herminio de Fátima Gonçalves relasiona ho prosesu ne’e. Maibé Dom Virgílio do Carmo seidauk marka prezensa iha tribunál, tanba seidauk iha despaixu husi Núnsiu Apostóliku. san