Surtu COVID-19 lori Xanana hakbesik povu

Líder karismátiku, Kay Rala Xanana Gusmão, hateten, ho surtu Corona Virus Disease 2019 (COVID-19) mak lori nia (Xanana) vizita no hakbesik liu tan ba povu no husu povu atu proteje-an husi COVID-19, tanba konsege hamate ema barak iha mundu.

“Ha’u agradese, tanba COVID obriga ha’u ba to’o fatin ne’ebé ha’u nunka ba, ha’u hanoin katak ha’u koñese Timor tomak, uluk sa’e foho tun foho, maibé fatin barak ha’u la koñese, COVID obriga ha’u ba to’o iha ne’ebá, ha’u agradese ba COVID bele hasoru malu ho ha’u nia bin-alin, feto ferik hanesan imi no maun no alin mane, katuas sira hamri’ik ne’e”, Líder karismátiku ne’e liu husi nia diskursu iha atividade asaun karidade ne’ebé hala’o husi eskola Sekundária Katólika Santa Madalena Canossa iha Postu Administrativu Remexio, munisípiu Aileu, Sábadu (07-08-2020).

Xanana afirma, Estadu tenke kontinua tau matan ba ferik-katuas sira, tanba sira mak terus durante tinan 24 no lori sira mak bele hetan ukun rasik-an.

“Estadu haluha tau matan ba imi, imi ferik-katuas sei moris mak funu-na’in, imi mak liberta rai ne’e, imi mak terus tinan 24 nia-laran, imi mak eroi, ita hakru’uk ba eroi no martir sira ne’ebé mate ona ne’e loos, maibé sira mate sira fó ezemplu ba ita katak, hakarak ukun-an tenke fó-an ba mate, maibé eroi loloos mak imi ferik-katuas, tanba terus tinan 24 nia-laran”, tenik eis Prezidente Repúblika ne’e.

Xanana realsa, sei kontinua ezije ba Governu no Estadu hadi’a povu nia moris, tanba ema barak ko’alia dehan veteranus, maibé realidade la halo buat ida iha pasadu.

Entretantu iha vizita ne’e, líder nasionál mós halo inagurasaun ba sítiu turístiku ne’ebé juventude sira harí iha Remexio Villa. ida