Arkidioseze Díli lansa dahuluk tradusaun Biblia Antigu Testamentu

Liu husi selebrasaun ezisténsia Dioseze Díli ba dala 80 Arkidioseze Díli hala’o lansamentu dahuluk ba tradusaun Biblia Antigu Testamentu.

Arsebispu Metropolita Díli, Dom Virgílio do Carmo da Silva, SDB, hateten, ezisténsia relijiaun Katólika iha Timor-Leste kuaze tinan 500 ona, tanba ne’e presiza duni iha Biblia ne’ebé ho tradusaun lian Tetun, nune’e fasilita sarani sira bele lee no hatene di’ak liu tan kona-bá Maromak nia liafuan.

“Ida ne’e la’ós ona finál, maibé iha tinan 5 ne’e nia laran dezde tinan 2016, Padre Manuel agradese ba Salezianu sira ne’ebé dedika-an atu halo tradusaun ida ne’e. Maske seidauk to’o ninia di’ak liu, dezde 2017 hahú hatún primeiru livru Santa Kreda nian, tinan 2018 livru istóriku, 2019 no 2020 nian kompleta livru haat hotu iha Antigu Testamentu ne’ebé prontu ita atu lansa. No lansamentu ne’e la’ós katak hotu ona, ida ne’e hanaran At Esperimentum, atu nune’e sarani sira bele lee, matenek na’in sira bele fó koresaun no ita hein katak molok ita hakat ba tinan 100, ita bele iha ona Biblia Tetun ne’ebé ema hotu bele simu tradusaun di’ak ida”, Arsebispu Metropolita Díli ne’e hafoin selebra misa aniversáriu ezisténsia Dioseze Díli, iha Igreja Katedrál Díli, Kuarta (08/12/2020).

Alende ne’e, Arkidioseze Díli mós atribui medalla no sertifikadu ba katekista hamutuk 30 husi Arkidioseze Díli, lansa mós planu estratéjiku Dioseze nian, inklui lansa programa misionáriu martirizadu sira, hodi rekolla dadus kona-bá misionáriu sira ne’ebé lakon ona sira-nia vida. san