JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Dom Virgílio: Dalabarak ita brani kontra lei, maibé la brani rekoñese sala

Dom Virgílio: Dalabarak ita brani kontra lei, maibé la brani rekoñese sala

Selebrasaun tinan 80 Arkidioseze Díli  ninia ezisténsia Tersa (8/12/2020), nu’udár loron istóriku ba povu no sarani Katólika Timor-Leste. Tanba ne’e Arsebispu Metropolita Díli,  Dom Virgílio do Carmo da SilvaS.D.B. hateten, ho komemorasaun ne’e sarani sira hotu bele brani atu halo buat ne’ebé loos iha Maromak nia futar-oin no ba ema hotu-hotu iha moris tomak.

Alende ne’e Igreja Katólika mós selebra loron Na’in Feto Imaculada da Conceição ne’ebé nu’udár mahein ba ba Arkidioseze Díli no mós mahein ba nasaun Timor-Leste. Selebrasaun ne’e partisipa mós husi Bispu na’in rua seluk hanesan Bispu Dioseze Baucau, Dom Basílio do Nascimento no mós Bispu Dioseze Maliana, Dom Norberto do Amaral.

“Buka atu kompriende Maromak nia planu mai ita ida-idak, saída mak Maromak nia planu orijinál mai ha’u, saída mak Maromak nia planu ba ita-nia rai ida ne’e, povu ida ne’e no Kreda ida iha tempu ida hanesan ne’e. Maromak nia futar-lia konvida ita atu foku de’it ba buat ida mistériu salvasaun. Ne’e duni maluk doben sira saída loos Maromak hein husi ita, entaun ita-nia destinu mak ida ne’ebé molok atu hakiak mundu Maromak fihir kedas ona ita atu ita moris nu’udár ema santu, moris nu’udár ema sala la’ek iha Na’i nia futar-oin. Maibé ema nia resposta ba Maromak nia planu mak saída? Leitura aprezenta mai ita drama sira-nia konsekuénsia saída mak mosu ba Adão, mosu ba samea, Maromak buka Adão hodi bolu, ó iha ne’ebé? Maibé silénsiu, nia la hatán. Situasaun ida ne’e dalabarak halo ita mós esperiénsia sente la soi hamri’ik iha Maromak nia kadunan, laiha kbi’it atu rekoñese ita-nia sala, la brani atu hatán ba buat ne’ebé ita halo, brani halo, maibé la brani atu hatán, ida ne’e mak dalabarak mós akontese iha ita-nia sosiedade, dala barak ita rona bei-beik liafuan deskoñesidu, dalabarak ita brani halo hahalok ruma ne’ebé kontra lei no kontra justisa, maibé ita la brani atu hatán. Hanesan aman ida, Maromak laran susar tebes hahalok aat oan nian ne’ebé halo hasoru nia-an, no estraga nia-an rasik. Tan ne’e aman preokupa basá nia hakarak oan ninia di’ak, preokupasaun ne’e mós dalabarak inan-aman sira iha duni bainhira oan sira la hatudu nia obediénsia hodi rona no haktuir”, Arsebispu Metropolita Díli ne’e iha ninia omília ba sarani sira iha Igreja Katedrál Díli.

Dom Virgílio mós agradese ba sarani sira iha Arkidioseze Díli, tanba maske pandemia COVID-19 obriga ema atu iha distansiamentu, maibé sarani sira animadu no kontente loos lori inan Maria sala la’ek nia illas halo viajen husi Arkidioseze ba parókia sira no hakat liu tan tun to’o estasaun no kapela sira hotu.

“Komemorasaun 80 aniversáriu Arkidioseze iha tinan ida ne’ebé ita hanaran tinan pandemia COVID-19 obriga inan sala-la’ek nia illas mak tenke halo viajen husi Arkidioseze ba parókia sira no nia hakat liu tan tun to’o estasaun no kapela sira hotu, sarani sente kontente animadu hodi simu maske rai-manas, malirin, sira la sente, sarani sira sente maske Corona obriga ema hotu atu iha distansiamentu, maibé sira haksolok, tanba bele hatene, bele hadomi mahein Arkidioseze ninian Imaculada Conceição, ne’ebé tun ba vizita nia oan sira, nia lori hakmatek ba hirak ne’ebé tauk, nia lori ksolok ba hirak ne’ebé triste, nia lori fiar ba hirak ne’ebé fi’ar ne’ebé karik namlele dau-daun, Na’in Feto mak tun ba konvida sarani ida-idak, Na’in Feto mak tun ba konvida família ida-idak, família, sarani atu ohin ita bele hamutuk hanesan komunidade sarani ida iha Dioseze, iha Katedrál, ha’u fi’ar katak, iha ne’e iha reprezentante husi ita-nia parókia sira karik ita iha hotu no la’ós tanba ha’u mak konvida, maibé Na’in Feto Imaculada Conceição, ne’ebé nia festa ita selebra ohin nia mak konvida, Na’in Feto mak lori imi mai, ida ne’e atu ita bele halibur hamutuk nu’udár povu ida, sarani ida atu hananu ba Na’in Feto, mai ita hananu knananuk foun, basá tinan 80 nia laran ne’e Maromak halo ona buat kmanek no halo buat furak oi-oin mai ita no mai ita nia rain, tanba Maromak la sukat nia domin mai ita, Maromak fó nunka sura, maibé ita mak la rekoñese di’ak Maromak nian mai ita, tan ne’e atu fó de’it oras ida ba Maromak mos karak tebes, tanba buat hotu enérjia nia mak tau no tempu ida nia sei foti fali, ne’e duni mai ita hananu hawelok no hana’i, basá nia de’it mak ita-nia liurai”, dehan Arsebispu Metropolita Díli ne’e.

Nia husu mós ba sarani sira atu hamutuk ho Kristu labele tauk no labele moe atu hahí nafatin Maromak.

“Iha Kristu de’it mak ita sei la tauk, ita sei la moe, basá sala mak halo ita fila kotuk ba Maromak, ita hotu hodi batizmu santu, ita Kristu nian, sé ita Kristu nian, maluk doben sira tanba sá hahalok jintiu ninian ita sei lori, soe bebé, ataka malu, hatún malu, oho malu, korupsaun, diskriminasaun, ho seluk tan sei buras iha ita-nia sosiedade ida ne’ebé ita hanaran maioria sarani”, haktuir Dom Virgílio.

“Nossa senhora Imaculada Conceição iha momentu istóriku igreja lokál nian tenke sai espasu ida ba ita atu deskobre fila-fali furak vokasaun sarani, buka atu rekupera identidade sarani ne’ebé loos, la’ós iha karta identidade de’it, maibé iha moris ne’ebé iha koerénsia ne’ebé loos”, tenik Arsebispu Metropolita Díli ne’e.

Nia akresenta, iha tinan oin mós Dioseze Díli sei kontinua ho atividade pastorál ninian ho tema Cristão Eucarístico, ne’ebé halo eukaristia sai sentru moris komunidade no sarani ninian.

“Dioseze Díli iha tema pastorál tinan ne’e nian Cristão Eucarístico, iha tinan oin mós ami hakarak atu kontinua nafatin, basá ne’e sei to’o ita, atu ita atu hatene hadomi, ne’ebé halo eukaristia sai sentru moris komunidade, moris sarani ninian. Ida ne’e mak segredu Maria Santísima nia moris, nia husik nia-an tomak ba Maromak nia planu, ida ne’ebé husi nia mak sei moris, santu boot ne’ebé mak sei hanaran Maromak nia oan, buat ida ne’ebé Adão ho Eva la konsege halo, tanba sira la hatene koopera ho Maromak nia planu, maibé iha Maria hatene rona, nune’e  Maromak nia planu realiza iha nia, hanesan ita atan mak ne’e halo tuir ita liafuan-ba. Maria, nia hatán simplesmente aktu de obediénsia, dalan ida ne’ebé hatene tau nia-an iha Maromak nia futar oin no hatene estabelese relasaun ne’ebé loos iha Maromak, basá nia rasik mak dehan tiha ona katak, Maromak iha nia. Ave, feto kmanek wain tebes, nia ida ne’ebé Maromak hadomi no nia mak transforma Maromak nia domin. Maria hatán ba nia (Maromak) dehan, atan-oan mak ne’e! ha’u ne’e ita atan de’it, Na’i nia atan. Maria tau buat hotu iha Maromak nia liman”, dehan Dom Virgílio.

Nune’e mos reprezentante sarani Katólika liu-liu Arkidioseze Díli, António da Conceição (deputadu), hateten, inan virjen Imaculada Conceição, mahein Dioseze Díli nian no mahein nasaun Timor-Leste nian, hada’et ema hotu nia orasaun ba aman Maromak ne’ebé halo buat hot-hotu atu Igreja Katólika iha Timor buras ba nafatin, haraik Timor-Leste nafatin sai Terra de Santa Cruz.

“Tinan 80 Dioseze Díli hamri’ik no Maromak nia obra fó ona fuan lobun ba ita-nia rai, ita-nia nasaun país Katóliku, ho populasaun maioria sarani Katóliku, ita iha padre lobun, madre lobun no amu Bispu sira. Igreja nia kna’ar boot tebes iha tempu luta to’o ba ukun rasik-an no agora mós Igreja halo nafatin nia kna’ar nu’udár profétiku atu bolu ita hotu ba lia loos, ba justisa”, dehan António.

Partisipa iha misa komemorasaun Arkidioseze Díli no selebrasaun Nossa Senhora Imaculada Conceição mak hanesan, eis Prezidente Repúblika, José Ramos Horta, Primeiru Ministru, Taur Matan Ruak ho nia espoza, Majór Jenerál F-FDTL, Lere Anan Timur ho nia espoza no mós entidade sira seluk tan. GMN

Lee hotu :   Sosiedade Sivíl kritika KomJer PNTL

Add to Comments Here!!!!

error: Content is protected.
Secured By miniOrange
You might also like:
Ministro Pedro dos Reis: Covid-19 tem ensinado povo timorense a trabalhar mais

O Ministro da Agricultura e Pescas,...

CSEP: Covid-19 afeta vida dos jovens, educação e emprego

José de Jesus Coordenador Nacional da...

CNRT: Cesta Básica só beneficia empresas e Governo, PM deve cancelar programa

A bancada do Congresso Nacional para...

Close