Espoza PR fahe prezente Natal ba pasiente labarik sira

Espoza Prezidente Repúblika (PR), Cidalia Mouzinho Guterres, hamutuk ho espoza ofisiais PNTL no F-FDTL fahe prezente Natal ba labarik pasiente sira hamutuk 100 resin, ne’ebé hala’o hela tratamentu iha Hospital Nasional Guido Valadares (HNGV) Díli..

 “Tinan-tinan Gabiente Apoiu Atividade Espoza Prezidente Repúblika, hamutuk ho espoza ofisiais PNTL nomos F-FDTL kontinua ami nia programa fo apoiu ba maluk defisiensia sira, tinan ida ne’e Gabiente selebra iha Munisipiu Baucau, tuir mos programa vizita Prezidente nian, hamutuk ho difisiensia sira nomos ita nia alin oan sira ne’ebé mak iha uma mahon ami selebra iha ne’eba” dehan Espoza Prezidente Repúblika Cidalia Mouzinho Guterres ba Jornalista sira Kuarta (23/12/2020) iha HNGV.

Nia afirma, ohin (horiseik) sira kontinua  nafatin ho Gabinete hamutuk asosiasaun espoza ofisiais PNTL nomos F-FDTL ninian, sira hamutuk halao vizita ba Pediatria fo hela sira nia solidariedade nomos korajen ba inan aman sira.

“Ami nia orasaun nafatin dejezu, ita nia oan sira nia saude diak nafatin para nune’e iha Natal no tinan foun ida ne’e, ita hotu selebra ho Familia sira, kondisaun ne’ebé ita tau atensaun tebes,  ba pasiente labarik sira iha HNGV mak senti triste, kona-ba sira nia moras Doutor sira halo atendimentu nafatin, sira ne’ebé balun mai ho grave tebes, iha emerjensia hafoin muda fali mai sala pedeatria nian, prontu sira nia evolusaun diak tebes”, akresenta Cidalia.

Espoza ne’e hatutan, to’o inan aman mos kontente ho tanis, no dehan grasa a deus Doutora sira nia atendimentu diak nune’e sira nia oan bele salva, hanoin ida ne’e mak realidade Doutor, Enfermeiru sira enfrenta.

“La’ós Gabiente mesak maibe ho espoza PNTL no F-FDTL sasan ne’e husi São João Tasmania,  sira mak fo apoiu ne’e iha tinan kotuk,  hanesan Boneka no Brinkedus nomos material eskolar nian, ne’ebé mak iha balun ha’u fo tiha ona,  no balun mak fo ba HNGV, no tinan oin sei destribui taan ba eskola sira, pelu menus bele hakonu materiais balun nomos apoiu sira seluk”  fundamenta Espoza.

Diretor Jeral HNGV Aniceto Cardoso Barreto, agradese ba espoza Prezidente nomos husi Palásiu Prezidensial rasik ne’ebé fo suporta masimu ba atividade hodi ensera tinan 2020 to’o 2021 ida nian, suporta psikolojikamente nomos suporta Brinkedus ba labarik sira atu lembra katak loron natal loron kosolok no dame nian, nomos hatudu mos solidariedade ba labarik kiik oan sira, no inan aman ba prosperu ne’ebé diak 2021 nian.

“Husi Palasiu Prezidensial ninian, suporta mos nutrisaun, liu liu hanesan animal Karau oferse ba HNGV hodi oferese ba moras sira iha Natal ne’e, enkuantu labarik hamutuk atus ida resin baixa iha HNGV  mak simu Prezente Natal husi Espoza Prezidente Repúblika, balun ba iha pedeatria, balu mos ba Neotolejia, alende ne’e númeru rejista iha HNGV labarik hamutuk porsentu 12 kada fulan sofre moras Má Nutrisaun”,tenik DJ HNGV. Oly