Governu altera lei orsamentu Estadu no jestaun finanseira

Konsellu Ministru segunda (21-12) aprova ona alterasaun projetu Proposta Lei kona-ba enkuadramentu Orsamentu Jerál Estadu no jestaun finanseira públika ne’ebé aprezenta husi Ministru Finansas, Rui Augusto Gomes.

Projetu Proposta Lei ne’e propoin enkuadramentu foun ida ba Orsamentu Jerál Estadu no ba jestaun finanseira públika hodi substitui Lei n. 13/2009/ husi loron 21 fulan-outubru nian kona-ba Orsamentu no Jestaun Finanseira.

Diploma ne’e halo alterasaun ba rejime Orsamentu Jerál Estadu no jestaun finanseira públika nian atu nune’e aumenta klareza, estabilidade, fleksibilidade no transparénsia. Aleterasaun sira ne’e mak hanesan definisaun no perímetru orsamentál, planeamentu ba programasaun orsamentál plurianuál adosaun orsamentasaun tuir programa rejime prorrogasaun lei Orsamentu Jerál Estadu nian, ba rejime ezekusaun duodesimal no ba melloria informasaun orsamentál ne’ebé prodús ona.

“Proposta lei ne’e Governu halo tiha ona aprovasaun no sei hato’o ba iha Parlamento Nasional hodi nune’e Parlamento bele inisia processo interno Parlamento nian no Governo mos sei ba hatan”, hateten Ministru Presidénsia Konsellu Ministru, Fidélis Magalhães.

Iha reuniaun Konsellu Ministru ne’e mós Ministru Edukasaun, Juventude no Desportu, Armindo Maia, halo aprezentasaun preliminár ida ba apresiasaun projetu kooperasaun nian iha área desportu, entre MEJD no Ajénsia Internasionál kooperasaun Koreia (KOIKA).

 “Ohin Ministru Edukasaun Joventude no Desportu halo apresentasaun preliminar ida informa Konsellu Ministru konaba kooperasaun ida ne’e no iha tempu mai sei submete ba iha Presidensia Konsellu Ministru proposta ida atu nune’e Konsellu Ministru bele endorja proposta ne’e no ho objetivu Ministru Edukasaun iha futuro mai bele iha kompeténsia atu bele assina memorandu ida ho Governo koreanu atu halo inisiativa ne’e sai possível”, dehan Fidélis.

Projetu ne’e, ho valór dolar amerikanu millaun 6,5,  ho objetivu hodi aumenta partisipasaun labarik no joven sira iha desportu, liuliu iha modalidade futeból, liuhusi konstrusaun infraestrutura. Oct