Hafoin suspende viajen, Ró Sukses tula fali pasajeiru 1000 ba Oecusse

Ró-ahi Sukses halo viajen ikus ba tinan 2020 nian, hodi tula pasajeiru kuaze 1000 ba Oecusse. Maibé antes ne’e Prezidente Autoridade Rejiaun Administrativa Espesiál Oecusse Ambeno (RAEOA), Arsénio Bano, hasai sirkulár hodi suspende viajen lokál ba Oecusse, to’o tinan foun 2021.

“Tuir loloos ami nia ró atu halo viajen ba Oecusse ne’e iha Sábadu dia 26, maib’e labele tanba iha dia 24 lorokraik simu informasaun sirkulár ida hosi Prezidente Autoridade RAEOA ZEESM, atu halo loockdown, ró labele halo lai viajen, tanba detekta kazu COVID, ho nune’e ami kansela, no ami mós fó avizu ba ami-nia pasajeiru sira ne’ebé sosa ona tíket bele foti fali osan. Maibé depois ida ne’e, hosi Autoridade RAEOA-ZEESM  kontaktu fali mai iha dia 28 ohin atu bele halo viajen, hodi tula passajeiru, liu-liu Oecusse oan sira, tanba maioria sira barak mai tuir ka akompaña oan sira nia graduasaun”, afirma Diretor ró Sukses, Sansão Gomes, ba GMN, iha nia edifísiu Kolmera, Segunda (28/12/2020).

Maske nune’e, Sansão afirma tan, Ró Sukses kontinua implementa regras saúde mundiál nian, no kona-bá kuantidade passajeirus, diretór ne’e deklara, sei la implika ba kapasidade ró nian.

Alénde ne’e, passajeirus Cipriano Osvaldo sente kontente, tanba bele iha oportunidade atu bele halo viajen ba Oecusse, nune’e bele selebra tinan foun hamutuk ho família.

“Ami nain hirak iha ne’e apresia tebes, no agradese tanba PA, maske hasai ona despaxulabele atu halo viajen, maibé liuhosi konkordansia ho joven sira, hodi ohin loke tan viajen ida ne’e, ami prontu tama kuarentena, importante to’o fatin.”dehan passajeiru Ró Sukses ne’e.

Bazeia ba sírkular hodi suspende viajen entre Díli Oecusse, ne’ebé fó sai hosi Prezidente Autoridade RAEOA, Arsénio Bano, hahú hosi loron 24 fulan Dezembru tinan 2020 ne’e to’o 24 fulan Janeiru tinan 2021.Say