Reklamante subsídiu família husi Comoro keixa MSSI ba Parlamentu Nasional

Reklamante ba subsídiu uma kain USD 200 hosi suku Comoro kompostu husi aldeia 10 resin, Segunda (14/12/2020) ne’e hasoru malu ho deputadu sira husi komisaun F ne’ebé trata asuntu saúde, jéneru no sosiál, hodi hato’o lamentasaun tanba prosesu pagamentu ba reklamasaun pendente hela.

Porta voz ba reklamante, Simão Ximenes, afirma, Governu husik hela promesa semana ba fulan no fulan atu to’o fali tinan mós seidauk realiza, tanba ne’e, Simão promete, bainhira pagamentu refere la realiza antes Natal, nia parte atu mobiliza tan reklamante seluk hodi halo asaun portestu hasoru Governu.

“Ohin ami hasoru ona deputadu sira, sira (PN) mós konsege hetan resposta pozitivu mai ami, tanba telefone direta ba Diretór MSSI, depois Diretór ne’e mós esplika dehan semana ida ne’e atu halo ona pagamentu ba ami reklamante sira, tanba ne’e mak ami hein de’it, semana ida ne’e, komesa Tersa (ohin) to’o Sesta semoga sira (Governu) halo ona pagamentu, sé seidauk, na’i deputadu sira mós hateten bele fila-fali mai PN hato’o nafatin preokupasaun, tanba ne’e ami-nia direitu tomak, ami lakohi moris iha nasaun laran Governu halo diskriminasaun ba  ami, nu’udár nia povu rasik, balun fó apoiu, balun la’e, tanba ne’e mak ami mai ko’alia direta ho reprezentante ami povu nian iha uma fukun Parlamentu Nasional, atu bele buka solusaun ne’e”, afirma komunidade Aldeia 12 de Outubro, suku Comoro ne’e.

Sekretária meza komisaun F, deputada Helena Martins Belo, subliña, nia parte halo ona kontaktu direta ba Diretór Jerál Ministériu Solidariedade Sosial no Inkluzaun (MSSI), ne’ebé fó ona resposta pozitivu atu halo pagamentu iha semana oin, tanba ne’e reprezentante povu ne’e promete sei tun fiskaliza direta ba iha komunidade nia leet, bainhira promesa ikus ne’e la realiza.

“Sira-nia dokumentu ami hasa’i fotokópia no ami mós kontaktu kedas ba iha MSSI, iha reklamante sira nia oin kedas, ho speaker maka’as, hodi sira rona direta ami ko’alia ho sira MSSI no Diretór MSSI ne’e hatán dehan loos, pagamentu tarde tanba reklamante sira-nia naran kartaun eleitoral mak halo komplikadu uitoan, tanba naran balun kuaze atu hanesan de’it, maibé sei halo pagamentu iha semana ida ou rua nia laran ne’e, karik la konsege ami sei kontaktu fali ba komunidade ne’e ou ami mak tun direta ba suku sira hodi haree”, haktuir deputada ne’e.

Tanba sira halo verifikasaun entre MSSI ho Ministériu Administrasaun Estatal (MAE), agora kuaze 12 mill reklamante mak naran sai ona, dehan katak sira nia lista bele tama ona.

Antes ne’e, Diretór Jerál MSSI deklara, kuaze família rihun 10 resin mak hato’o reklamasaun ba subsídiu uma-kain ne’e.

Maibé Husi reklamante rihun 10 resin ne’e balun mak konsege finaliza ona iha faze verifikasaun, maibé balun sei prosesa iha MAE, tanba konsidera dadus komplikadu. say