La preokupa EE da-sia, komunidade hobur ba simu billete sesta bázika

Komunidade Aldeia Fomentu II no Baya Leste, Suku Comoro segunda (04-01) ne’e halibur malu iha Leader HYPERMARKET Ai-Mutin, Díli, hodi la liga régra Estadu Emerjénsia ba da-sia hodi prevene Covid-19 ne’ebé Governu aprova ona. Objetivu husi komunidade sira halibur malu ne’e  atu simu billete sesta bázika  ne’ebé Governu liu husi Ministériu Turizmu no Komersiu Industria oferese.

Xefi Suku Komoro, Eurico da Costa de Jesus,  hateten, sira realiza  atividade ne’e  tanba tuir oráriu Programa sesta bázika iha Suku Comoro ne’e loron 35 deit. Tanba iha suku Comoro  foin hahú ho aldeia lima deit, tamba ne’e tenke aselera lalais.

“Programa Sesta Bázika ne’e ami hetan orientasaun husi Ministériu Turizmu Komersiu Industria katak programa ne’e tenke kontinua tamba Suku Komoro ne’e hetan durasaun tempu ne’e loron 35 deit, ita fahe ba aldeia sanulu 14 ita haree katak tempu feriadu maka barak liu. Entaun ami la hanoin ona konaba dekretu Governo nian konaba Estadu Emerjénsia, maibé ami haree liu konaba ansiedade populasaun nian ba programa Sesta Bázika ne’ebé maka simu orientasaun husi Ministériu Turismu Komersiu Industria katak programa ne’e tenki hala’o lalais tamba Komoro loron 35 deit”, hateten.

Eurico da Costa de Jesus  husu atu Ministériu Turismu Komersiu Industria tenki halo fali programa ida tenki koresponde ho Ministériu Saúde nia programa no Dekretu Governo konaba Estadu Emerjensia.

“Hotu-hotu tenke tur hamutuk buka solusaun ba programa Sesta Bázika agora hanesan ami Xefi Suku ne’e haree deit ba durasaun loron 35 entaun ami mos hakarak atu asselera atu nune’e populasaun sira bele simu lalais hodi nune’e ami kontra regra barak liu-liu konaba protolu Ministériu Saúde nian ba prevensaun Covid-19. Ami tenta para haree tok ho metodo sa ida maka ami bele halo atu nune’e populasaun sira bele kumpri regras hirak ne’e”, hateten.

Tuir observasaun GMN iha terrenu nota katak ekipa sensibilizasaun Ministériu Saúde kontinua fóavizu ba komunidade konaba perigu husi surtu Covid-19 maibé populasaun sira kontinua la uza maskara no la mantein distansimentu sosiál husi ema ida ba ema seluk. Iha sorin seluk transporte públiku sira hanesan  autocarro nafatin tula passajeirus ne’ebé barak maske iha medida Estadu Emerjénsia ne’ebé Governu aprova ona prevé passajeiru sira bainhira bele tenki evita kontaktu fíziku.

“Konaba ida halibur malu ne’e, buat ketak ida, maibe konaba ami kondutor sira se enkuantu ami atu tula nain sanulu ba leten hau senti buat ne’e todan ida ba ami karik. Tamba ami kondutor, bainhira ami la’o mak foin bele pursentu, mas ami kuando tula deit nain sanulu ba leten ami konta sa ida ba mina konta sa ida ba ami nia pursentu no konta hira ba ema patraun sira nian”,  hateten Motorista Autocarro Claudinho Fernandes.

Konsellu Ministrus iha loron 30 tinan kotuk aprova ona projetu Dekretu Governu  kona-ba medida sira ba ezekusaun estadu emerjénsia nian. Estadu emerjénsia da-sia ema hotu-hotu ne’ebé la sujeita ba rejime izolamentu obrigatóriu bainhira la’o ain iha fatin públiku tenke la’o mesak, no uza máskara no mantein distánsia pelumenus metru ida husi ema la’o ain sira seluk no evita halibur malu. Bandu atu hala’o sorumutuk ka manifestasaun, nune’e mós kualkér eventu sosiál kulturál ka desportivu halibur ema na’in sanulu resin.Oct