JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Xanana vizita eis-padre Daschbach hodi selebra ninia aniversáriu

Xanana vizita eis-padre Daschbach hodi selebra ninia aniversáriu

Líder karismátiku, Kay Rala Xanana Gusmão, vizita eis-padre Richard Daschbach ne’ebé selebra ninia aniversáriu ba dala 84 iha Díli, Kuarta (26/01/2021).

Iha vizita ne’e Xanana hato’o mensajen felisitasaun husi orfaun sira iha Orfanatu Topu Honis Oe-Cusse. Selebrasaun aniversáriu ne’e simples no diferente ho tinan hirak ba kotuk ne’ebé sempre selebra ho labarik sira iha Orfanatu Topo Honis, maibé ba tinan ne’e tenke selebra mesak iha rezidénsia ida iha kapitál Díli, tanba submete hela iha prosesu justisa ligadu ho kazu ne’ebé eis-padre Daschbach enfrenta.

Maske iha ámbitu ne’ebé diferente, maibé eis-padre Daschbach hetan vizita supreza hosi prezensa líder karismátiku, Kay Rala Xanana Gusmão, ne’ebé iha biban ne’e aproveita hodi transmite hela lia menon hosi labarik sira iha Orfonatu Topo Honis ba eis-Padre Dasbach.

Xanana hato’o karta mensajen husi labarik Orfonatu Topu-Honis ba eis-padre Daschbach. Konteúdu husi karta ne’e labarik orfonatu sira hakerek katak, “Parabéns, ami hadomi nafatin Amu Dasbach”.

Mensajen ne’e hetan reasaun pozitivu husi eis-padre Dasbach, hodi kontinua husu tulun ba líder karismátiku atu tau matan ba labarik orfanatu sira iha Kuatete, Oe-Cusse, Ambeno.

“Ha’u ohin sente animadu tebes ho ita-nia prezensa, maibé ha’u husu nafatin ita-nia tulun hodi kontinua tau matan ba labarik orfonatu sira iha Kuatete. Ita nain-rua la importante ona, maibé labarik sira mak importante liu iha tempu oin mai no presiza tau matan ba sira”, hameno eis-padre Dasbach ba Kay Rala Xanana Gusmão iha Díli, hafoin vizita nia.

Entretantu eis Primeiru Ministru, Kay Rala Xanana Gusmão, antes ne’e sai nu’udár sasin ba eis-padre Dasbach nia kazu, bainhira julga iha Tribunál Distritál Díli iha tinan 2020.

Eis-padre Dasbach moris iha loron 26, fulan Janeiru, tinan 1937, iha Pennsylvania, Estadu Unidu Amérika, hahú tama lori misaun evanjelizasaun Katólika ba rai enklave Oe-Cusse-Ambeno iha tinan 1972 to’o tinan 2018.

Ordena sai Padre iha tinan 1965 no liu tinan rua de’it nia mai Nusa Tenggara Timur (NTT) no ikus liu tama ba Ambeno iha tinan 1972. Invazaun Indonézia mai Timor-Leste nia iha hela Oe-Cusse-Ambeno to’o tinan 1999 mós nia la hala’i hodi tuba-rai metin iha Kuatete, Ambeno no konsege subar joven lubuk ida husi atakasaun pro-integrasionista iha tempu ne’ebá.

Durante hala’o misaun evanjelizasaun, nia mós hari’i tiha uma mahon ida ho naran Topu Honis (Guide To Life) iha tinan 1993, ho objetivu atu fó mahon ba labarik kbi’it la’ek no orfonatu sira.

Rezultadu husi orfonatu ne’e, konsege lori nia amigu sira husi Amérika hodi halo adopsaun ba Ambeno oan na’in 7, oras ne’e remata ona sira-nia estudu iha ensinu superiór iha universidade balun iha Amérika no balun iha Austrália. Inklui mós balun oras ne’e iha deviza boot iha instituisaun F-FDTL no instituisaun Estadu seluk tan.

Oras ne’e nia kumpre hela prosesu judisiál (Termu Identidade Rezidénsia-TIR) iha Díli laran, hodi hein prosesu julgamentu tuir mai kona-bá alegasaun kriminál husi Ministériu Públiku (MP). GMN

Lee hotu :   Hakotu dezorden polítika, Evanjellu mak matadalan interpreta konstituisaun

Add to Comments Here!!!!

error: Content is protected.
Secured By miniOrange
You might also like:
PN preokupa sidadaun Indonézia buka dalan atu izola-an iha Covalima

Parlamantu Nasionál (PN) husu ba Governu...

PLP: HNGV fó prioridade liu osan do que ema nia vida

Reprezentante povu iha uma fukun Parlamentu...

Responsabilidade kriminál labele transmite ba ema seluk

Jurísta Timor-oan, Sérgio Quintas, subliña, lei...

Close