Padre Emanuel: Sarani tenke kria solidariedade ba malu

Padre Emanuel Lelo Talok, hateten, durante tempu kuarezma sarani Katólika tenke kria solidariedade ba malu, hodi moris tuir Kristu nia hanorin.

”Tanba ne’e iha tempu kuarezma Kuarta Feira Cínzas ita hotu-hotu mai, ita hotu hala’o hakribi sala internasionál, tanba ohin ne’e mundu tomak, sarani hotu hala’o rituál hakribi sala hamutuk nian, ema hotu-hotu sei tanis, ema hotu-hotu sei hatais simples no tau nia-an rai-rahun, atu ita fó hanoin ba malu katak, ita sira ne’e saída? Ita sira ne’e la importante ida, ita sira ne’e Maromak halo ita husi rai-rahun de’it, husi tahu de’it, só Maromak hú iis mak ita bele moris, tan ne’e mak ita lalika foti-an, lalika gaba-an no ita mós sei sala karik hakribi sala la-lais ba, atu ita bele sente fali Maromak nia domin ne’ebé perfeitu mai ita”, Amu selebrante ne’e iha nia omília Parókia São José Operáriu Ai-Mutin, Kuarta (17/02/2021).

Padre Emanuel esplika, iha selebrasaun Kuarta Feira Cínzas ba tinan ne’e, nia lala’ok diferensa ho tinan uluk, tanba la tau sinál kruz iha rentós, maibé kari de’it iha ulun, hodi evita kontaktu direta, entre sarani ho Amu-Lulik sira, hodi prevene transmisaun COVID-19.

Iha tempu kuarezma atividade ne’ebé sarani Katóliku hotu halo mak retiru, jejun, hadera-an, abstinénsia no mós apoiu solidaridade ba malu.

Entretantu selebrasaun loron kuarezma hahú ho Kuarta Feira Cínzas ne’e, konvida sarani Katólika sira atu halo jejun no abstinénsia durante loron 40, molok simu Jezus nia moris hias iha selebrasaun Festa Páskoa. san