Komunidade sira pasa sasán ba malu iha ho triste

Komunidade husi munisípiu sira seluk pasa osan no sasán nesesidade bázika ba família sira iha liña fronteira entre munisípiu Díli ho sira seluk hodi sosa sasán nesesidade bázika durante serka sanitária. Tanba ne’e halo komunidade sira triste teb-tebes.

Komando Polísia Nasional Timor-Leste (PNTL), munisípiu Díli Kuarta (17/3/2021), autoriza komunidade pasa sasán nesesidade bázika iha liña fronteira  entré Díli ho munisípiu sira seluk, atu bele hatutan moris iha serka sanitária ho konfinamentu obrigatóriu.

Tanba ne’e, iha Kinta (18/3/2021), komunidade husi munisípiu sira kontakta família iha Díli laran hodi hasoru malu iha fronteira entre munisípiu Díli hodi pasa osan atu mai sosa sasán nesesidade bázika iha kapital Díli hodi tula ba entrega fali ba família sira atu lori ba munisípiu sira.

Alende ne’e, negosiante sira ne’ebé lori modo husi munisípiu Ermera no Liquiça mós  pasa osan no modo-tahan ba malu iha Tasi-Tolu no Tibar. Situasaun ida ne’e halo ema triste.

“Ha’u mai husi  Suai maibé ami labele ba liu Díli. Tanba ne’e ha’u mai pasa osan ba alin mane ne’e atu sosa sasán, hanesan fos, supermi. Ita triste”,dehan kompradór Suai, Andre de Sena.

Tuir informasaun, husi parte Polísia katak,  sira   rejista ema ne’ebé mak  pasa sasán nesesidade bázika iha liña fronteira entré Kasa-Nafar no Consin Aileu hamutuk 50 resin. Maibé Komando mak autoriza, sasán bele transfere livre, maibé sira labele tama Díli.

Governu aplika serka sanitária iha kapitál Díli hahú iha Tersa loron sia fulan Marsuto’o  Segunda loron 15  hodi limita movimentu komunidade husi munisípiu mai Díli no Díli ba munisípiu hodi hala’o prevensaun ba surtu COVID-19.

Maibé   husi loron ba loron Ministériu Saúde rejista hela de’it kazu  posetivu COVID-19, tanba ne’e Governu estende serka sanitária ba faze daruak iha kapitál Díli,  iha Tersa loron 16 fulan Marsu to’o fulan Abril tinan ne’e.

Serka sanitária ne’e, Governu aplika mós ba munisípiu Baucau no Viquque, tanba munisípiu rua ne’e rejista ona kazu pozitivu COVID-19.avi