Tenta korta dalan ba Baucau, PNTL kaptura ema 13 submete ba teste swab

Ekipa  Ministériu Saúde (MS) hala’o teste swab ba ema na’in 13, tanba tenta hala’o viajen husi Munisípiu Díli ba Baucau liu husi dalan klanestina, maibé  kapturadu husi  Komando Polísia Nasionál Timor-Leste (PNTL) Manatuto, iha Domingu (21/03/2021) mais ou menus besik tuku ida madrugada. 

Ema na’in 13  husi Munisípiu Díli atu  ba Munisípiu Baucau, dezvia husi Postu Polísia iha Metinaro,  hodi liu fali dalan klanestina ida  husi Subaun kotuk hodi ba sai iha Laklo, maibé hetan kapturasaun husi  Komando PNTL munisípiu Manatuto,  tanba la uza guia de marcha husi Sentru Integradu Jestaun Krize.

Hafoin kaptura tiha ema sira ne’e, Komando PNTL Manatuto kontakta ba iha Komando PNTL Munisípiu Díli hodi entrega ema sira  mai  iha PNTL Díli,  hodi  hasai ema  sira-nia identitidade

Nune’e parte PNTL kontakta kedas ba  ekipa  saúde pillar III Ministériu Saúde  hodi submete ba teste swab  ba ema na’in 13, iha resintu Kuartel Polísia Kaikoli, Díli.

“Ita-nia sidadaun  13  ne’ebé mak komando PNTL munisípiu hala’o prosesu identifikasaun, sira na’in 13  ne’e desobediénsia  ba  rezolusaun ne’ebé Governu fó sai, ne’ebé iha kapitál Díli lockdwn agora dadauk ne’e, sé de’it mak  iha nesesidade  atu ba munisípiu tenke iha autorizasaun formal mai husi sala situasaun, sira na’in 13 laiha. Ita halo prosesu identifikasaun,  tanba  iha kooperasaun di’ak ho Komando PNTL munisípiu Manatuto, ema sira desvia tiha husi postu  seguransa Polísia nian  ne’ebé mak iha Metinaro, utiliza dalan klandestina bele mosu iha Laclo nian, liu husi Subaun nia kotuk. Tanba ne’e mak Komando Polísia Manatuto halo kapturasaun ba sira, entaun Komandante Manatuto komunika mai ha’u hodi koordena atu nune’e sira na’in 13, inklui mós motor hitu sira  uza, hodi entrega fila-fali mai  Komando PNTL Díli, liu husi Komandante Eskuadra Metinaro. Entaun ita halo koordenasaun  ho parte saúde  nian hodi haruka dotór sira mai hodi  halo swab teste ba sira”,esplika  Segundu Komandante PNTL  Munisípiu Díli Superintendente Euclides Belo, ba jornalista sira, hafoin katura.

Entre ema na’in 13 ne’e, mane na’in 12, feto ida. No tuir informasaun husi parte Polísia Seksaun Servisu Investigasaun katak, ema sira ne’e sai husi Díli atu ba Baucau, tanba atu ba haree família mate iha Suku Sagadati, Postu Administrativu Laga.

Hafoin hala’o teste swab ba ema na’in 13, Polísia hala’o identifikasaun ba sira nia dokumentu motor, hafoin haruka ema sira fila ba uma, hodi hein rezultadu teste swab, husi ekipa saúde pillar III lori ba iha laboratóriu.avi