JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Família matebian FG husu Governu tau-matan ba rate iha Metinaro

Família matebian FG husu Governu tau-matan ba rate iha Metinaro

Família matebian Francisca Gama, Sesta ne’e bá hasoru malu ho ekipa Sentru Integradu Jesaun Krize (SIJK), hodi husu bá Governu atu nune’e tau kondisaun ne’ebé diak bá matebian Francisca nia rate iha Simitériu Covid-19 Metinaro.

Matebian Francisca Gama, nu’udar ema primeiru ne’ebé haloot iha loron 06 fulan Abril tinan 2021, iha simitériu Covid-19 Metinaru, hafoin médiku sira identifika pozitivu Covid-19, no wainhira matebian hakotu iis.

Reprezentante família matebian, Francisco Ximenes hateten, sira nia sorumutu ho ekipa SIJK ne’e la’os atu protesta no kontra desizaun Governu nian, maibé família sira husu ba Governu atu halo lutu haleu matebian nia rate,  hodi bele asegura hosi estragus.

“Fatin ne’ebá mós semitériu ne’ebé fatin foun primeira-ves hakoi matebian Francisca Gama  iha ne’ebá  iha bubur laran iha tempu ida hanesan ne’e. Iha asaun ida loron rua tolu liu bá ha’u fiar katak, ema ruma sei mate karik mate ba Covid sei la hakoi tan iha ne’ebá, hanesan dadaun Armindo Borges fó família atu haloot, entaun Francisca sei mesak iha ne’ebá, tanba ne’e mak ami sujere ba iha Governu sebele halo netik serku oan ida iha ne’ebá para animal labele sama, no animal labele hakat ba mai iha ne’ebá. Ne’ebé SIJK  mós simu ida ne’e atu hamutuk ho família hodi harii nia krus oinsa atu ba tau aifunan iha ne’ebá, ne’ebé iha loron 4 mai ami sei ba vizita matebian nia rate”,  Francisco Ximenes, informa ba Jornalista sira iha Sala Situasaun Jestan Krize CCD, Sesta (16/04/2021) wainhira hasoru malu ho ekipa SIJK, hodi hato’o sira nia lamentasaun, ne’ebé mak durante ne’e sira rai de’it iha sira nian fuan.

Lee hotu :   Hakarak proteje povu, PR Lú Olo dekreta EE

Francisco hateten,  maske família matebian sente triste,  tanba Francisca nu’udar ema primeiru ne’ebé konsideradu mate ho Covid-19 iha Timor-Leste,  no haloot iha semitériu Covid Metinaru,  la hanesan ho matebian Armindo ne’ebé haloot hosi família,  tuir família nia kultura.

“Tuir kultura ita  nian parte ami Baucau mate hanesan ne’e, tanba matebian nia oan na’in 2, oan  ida hamutuk ho nia aman  iha Sala Situasaun,  ida oan bo’ot ne’e  iha ne’e hela,  tuir loloos ne’e família ho matebian nia oan mane tenki fo ultima omenajen ba nia inan  ida ne’e mos la akontese, tanba tenki hakruk ba desizaun no protokolu MS ho OMS”, nia koalia ho matawen.

Tuir Francisco katak,  wainhira matebian kompleta ona tinan 5,  ou 8 nia laran,  família sei foti fila-fali matebian nia  restu mortais bá halot iha moris fatin,  tuir kultura matebian nian.

Nune’e mós Koordenador Forsa Tarefa Prevensaun no Mitigasaun Surtu Covid-19,  Rui Maria de Araújo, louva disponibilidade família matebian nian, hodi bele espresa sira nia lamentasaun,  kona-ba prosesu funébre ne’ebé halo ona iha loron hirak liu bá.

“Ami hanesan ekipa teknika ne’ebe servisu iha terenu ami mós aproveita oportunidade ida ne’e hato’o deskulpa bá família, ami komprende família ninian lamentasaun hanesan sira nia portavoz hatete ona, kestaun sira ne’ebe hatete atu selebra matebian nia aifuna midar depois tau krus ne’e ami depois kombina para halo hamutuk. Sujestaun ne’ebe ohin sira fó kona-bá aspeitu kultura ninian hanesan  tau netik tais, ohin  kontempla hotu ona iha prosedimentu sira ne’ebe atu halao ba oin ita espera katak ita sei laiha tan óbitos ita halo esforsu maka’as atu labele iha óbitos, maibé wainhira iha,  ita sei la repete tan lakunas ka falta sira ne’ebe ita halo hosi aspeitu uzu apsietu de kultura ninian hodi nune’e ita hotu hanesan povu, hanesan nasaun ita respeita nafatin kultura ho uzu kustume ne’ebe ita iha”, informa Rui.

Lee hotu :   SEAKLN ofisialmente kansela komemorasaun loron eroi nasionál

Iha biban ne’e Rui afirma,  iha soromutu ne’e,  konkordánsia ne’ebé iha ho família ida ne’e, família matebian sira mós hameno katak,  sira nia esperensa bo’ot katak, família sira seluk aban bainrua karik iha mós ema ruma lakon vida relasionadu ho moras ida ne’e labele hetan tan esperénsia hanesan sira.

“Wainhira sira haree sira nia maluk ida hakoi, tuir ita hotu hatene ladun dignu haree hosi prespektiva kultura ninian, loloos ami rekoñese ida ne’e, ami sei halo buat hotu ne’ebé ami bele,  atu labele repete tan erru ida ne’e”.

Iha sorumutu ne’e marka prezensa mós alénde família matebian,  iha mós Reitór Semináriu Menor Balide Padre  Ángelo Salsinha, Komodor Pedro Klamar Fuik,  no Dotor sira ne’ebé servisu iha SIJK.

Matebian Francisca Gama, hosi Postu Administrativu Laga,  Munisípiu Baucau,  identifikadu mate ho Covid-19. Matebian hakotu iis  iha loron 5 fulan Abril ne’e, no husik hela la’en-kaben ho oan na’in 2.

Antes ne’e matebian sofre moras rins hodi fase ran iha Hospital Nacional Guido Valadares (HNGV), ikus mai médiku sira identifika matebian pozitivu ba Covid-19, nune’e lori matebian ba izolamentu Tasi-Tolu, no ikus mai transfere fila-fali matebian bá iha sala izolamentu Vera Cruz to’o hakotu iis.Eni

 

Add to Comments Here!!!!

error: Content is protected.
Secured By miniOrange
You might also like:
Somotxo: Ha’u laiha intensaun atu ameasa povu

Prezidente Komisaun B  ne’ebé trata asuntu...

PM Taur: SIJK reprezenta ha’u koalia ho Maun Xanana ■Husu deskulpa ba família matebian FG

Primeiru Ministru (PM), Taur Matan Ruak,...

Governu entrega mate-isin ba família, Xanana: Laiha ida mak manan, laiha ida mak lakon

Governu liu husi Sentru Integradu Jestaun...

Close