PPN: Simu vasinanasaun AstraZeneca la halakon totál COVID-19

Prezidente Parlamentu Nasionál (PPN), Aniceto Guterres Lopes, husu sidadaun sira iha Timor-Leste (TL) atu kolabora ho pesoál saúde, hodi simu vasina AstraZeneca, maske vasina ne’e la halakon totál, maibe bele minimiza transmisaun grave ba moras COVID-19.

Líder órgaun reprezentativu povu ne’e afirma, maske iha lansamentu ne’e, estrutura meza Parlamentu de’it mak marka prezensa hodi simu vasina, maibe nia parte husu mós atu deputadu hotu bele simu vasina refere.

“Atu kontrola Covid-19 ne’e, ida mak ita ida-idak nia komportamentu no ida seluk mak vasina. Ho pontu rua ne’e mak ita bele kontrola Covid, maske la halakon totál, mais ita bele kontrola Covid-19. Nu’udar Prezidente PN, ha’u konvida ema hotu atu partisipa no kolabora ho programa Governu nian ne’e, para Timor-oan no Estadu tomak ita bele kontrola Covid-19 ne’e. Deputadu sira sei vasina tuir mai, ohin ne’e programa lansamentu de’it, PR mak sei taka ikus de’it, PM, PPN, PTR, Amu Bispu Díli mós mai hotu. Ne’eduni husu atu lalika tauk, aviza konvida ema hotu para atu partisipa iha programa ida ne’e, lalika rona hoax ka propaganda atu impede programa ne’e, saúde ne’e iha ema ida-idak nia liman. Vasina di’ak hela,  ha’u tanba sei ki’ik mós simu tiha vasina kona-bá malária nian, ne’ebé toman, mas la sente buat ida hafoin simu vasina ne’e, até vasina ida uluk ne’e, parese tanba ha’u sei ki’ik ne’e karik, moras, maibe ida ne’e di’ak loos ita la sente buat ida. Ohin depois de 30 minutu sira halo observasaun ba ami mós, maske ha’u ohin dader lakonsege matabixu, maibe la sente buat ida.”motiva Prezidente PN ne’e, hafoin simu vasina, iha lansamentu vasinasaun ba Covid-19, iha Kuarta (07/04/2021).

Ministériu Saúde lansa ona vasina AstraZeneca dahuluk ba Primeiru Ministru ho nia membru Governu sira, Prezidente Parlamentu Nasionál, ho estrutura meza Prezidénsia,  Arche Bispo Dom Virgílio do Carmo, eis Prezidente Repúblika, José Ramos no selukta.Say