Xanana kontinua fó apoiu ba vítima inundasaun sira

Líder karismátiku, Kay Rala Xanana Gusmão, kontinua halo asaun karidade hodi fó apoiu ba komunidade ne’ebé afetadu ba inundasaun foin lalais ne’e, iha ne’ebé rezulta komunidade barak maka lakon uma, sasán no balun tenke lakon vida.

Asaun karitativa ne’e hala’o iha Parokia Bedois Tersa (6/4/2021), Aitarak Laran inklui Manleuana, Kuarta (7/4/2021).

Apoiu ne’ebé Eis Prezidente Repúblika, Kay Rala Xanana Gusmão, fó ne’e maka nesesidade bázika, hanesan, sponza, sumasu, bikan no materiál sira ne’ebé hodi hamoos tahu.

Ba asaun karitativa ne’ebé eis Primeiru Ministru, Kay Rala Xanana halo ne’e, komunidade sira sente kontente no agradese tebes, tanba bele hakma’an sira-nia todan, tanba maioria husi komunidade sira ne’e lakon totál sira-nia sasán no obriga sira tenke refujia ba fatin seguru sira.

“Ami agradese, tanba Maun Bo’ot Xanana mai halo vizita, ba diretamente mota-ulun haree fatin ne’ebé afetadu maka’as. 15 família mak lakon uma totál”,hatete Padre Parókia Bedois Becora, Albertin.

“Antes ne’e ajudu mai ne’e konsentra hotu iha Ministeriu Finansa, populasaun barak mak iha ne’e afeta duni, husik uma, sasán estraga hotu. Agora dadauk, Avo Xanana mak tama primeiru ida ne’e hodi fó sasán, ami orgullu ho prezensa Avo Nana nian iha bairu ne’e hodi fó ajuda. Foin Avo Xanana mak tama mai, bo’ot sira (Governu) seidauk iha ida mak mai koalia netik itoan katak, povu Aitarak Laran ne’e presiza saida? Lae,”,dehan komunidade Aitarak Laran, Asanko.

Líder nasionál ne’e mos husu ba komunidade atu korajen nafatin, labele tanis, no tenke kontinua halo orasaun ba nai maromak atu hakmaan susar sira hotu.

“Maromak hakarak nafatin koko ita, hodi haruka udan bo’ot hodi ita terus. La’ós ita imi mesak, to’o Hera iha ne’ebé ne’ebé deit. Ne’ebé hau hatene katak sasán hotu lakon, maibe fiar nafatin katak provasaun ne’e sei liu, ita nia susar ne’e sei liu, lalika tanis, maromak sei fó tulun nafatin, rai-lulik sei fó tulun nafatin, ne’e duni la lori buat barak, la lori buat barak”,dehan Xanana.

Iha observasaun GMN nian, bainhira kareta líder karismátiku, Kay Rala Xanana Gusmão nian para no nia seidauk tun husi kareta-laran, povu afetadu husi inundasaun foin lalais ne’e fó kedas “Viva Xanana, Viva Maun Bo’ot Xanana”, nune’e líder karismátiku ne’e tun hakoak sira hotu tuir karáter orijinál líder nasionál ne’e nian rasik hodi fó motivasaun ba vítima inundasaun sira.

Iha parte Manleuana, Xanana halo kedas observasaun ba iha mota ne’ebé sobu komunidade nia uma no orienta kedas ekipamentu pezadu hodi normaliza mota ne’e.Nes