CLN rekoñese SS no KO fó impaktu ba povu hamlaha

Autoridade Centro Logístico Nacional (CLN), rekoñese, situasaun serka sanitária (SS) no konfinamentu obrigatóriu (KO) fó impaktu maka’as ba povu hamlaha, liu-liu laiha atividade akonómika ne’ebé la’o ho di’ak.

Realidade ne’ebé akontese ba komunidade iha terenu, liu-liu iha implementasaun Estadu Emerjénsia, Serka Sanitária no Konfinamentu Obrigatóriu populasaun iha fatin-fatin halerik ba hamlaha, maske Governu liu husi CLN fó ona fóos ba Ministériu Solidariedade Sosiál no Inkluzaun iha semana kotuk.

Ho situasaun ne’e, Prezidente CLN, Augusto Junior Trindade, relata, iha semana kotuk, CLN fornese ona foos marka CLN-RDTL ho toneleda atus hitu ualu nulu ba Ministériu Solidariedade Sosial no Inkluzaun, atu fahe ba ema ne’ebé hamlaha iha situasaun atuál.

Maske CLN oferese ona foos ba MSSI hodi oferese ba ema sira ne’ebé enfrenta hamlaha  iha implementasaun Serka Sanitária no Konfimamentu Obrigatóriu, no CLN nafatin prontu apoiu foos, bainhira ministériu kompetente submete dadus.

“Ita-nia intervensaun ita hasai ona foos husi armajen 7.457 tonelada ne’e komesa sai ona ba komunidade sira-nia le’et ne’e liu tonelada rihun 390 resin agora iha ona komunidade sira nia le’et siginifika katak entermus de presu ita haree ona katak normal. segundu hahan ne’e iha ona komunidade sira nia le’et, maibe afeta nafatin ami halo peskiza ki’ik-oan kapasidade kompra mak tun impaktu husi serka sanitária ema la dun book-an”,Prezidente CLN, Augusto Junior Trindade ba GMN iha nia knaar fatin, Fomento, Segunda (10/05).

Tuir Augusto, maske kapitál Díli iha hela serka sanitária no konfinamentu obrigatóriu no munisípiu hirak seluk mós iha hela serka sanitária hodi bandu sirkulasaun ema no transporte públiku, maibé foos husi CLN kontinua tama-sai ba munisípiu hodi fó apoiu ba komunidade ne’ebé enfrenta hamlaha.

Antes ne’e Governu liu husi Centro Logístico Nacional, apoiu foos tonelada rihun rua ba munisípiu Bobonaro, Covalima no mós ba estudante sira ne’ebé hela kost iha kapitál Díli.

Tuir Dadus ne’ebé GMN asesa, foos ho marka CLN, ne’ebé Governu sosa husi nasaun Vietname iha tinan kotuk ho tonelada rihun tolu nulu resin rai iha armajen CLN, dadaun ne’e menus ona ba tonelada rihun sanulu resin ualu liu.

Governu prevé OR tokon USD 12 ba CLN

Nune’e mos, atu garante seguransa alimentar (SA) iha rai-laran, Governu prevé Orsamentu Retifikativu (OR)  tokon USD 12 ba Centro Logístico Nacional (CLN).

Orsamentu retifikativu ne’ebé parlamentu nasional aprova, no promulga ona husi Prezidente Repúblika, Francisco Guterres Lu Ólo, Governu prevé tokon sanulu resin rua ba, CLN hodi garante seguransa alimentar iha rai laran.

Prezidente Centro Logístico Nacional, Augusto Junior Trindade, esplika, orsamentu refere sei fó prioridade ba produtu rai laran li-liu hare kulit, tanba dadaun ne’e hare kulit no foos lokál iha armazen CLN mamuk.

Agusto Junior, hateten, durante ne’e Centro Logístico Nacional, sosa hare kulit iha munisípiu Covalima, Baukau, Viekeke, Maliana no tuir planu tinan ne’e CLN sei sosa hare kulit tonelada rihun ha’at resin.

“Fó prioridade boot ba seguransa ai-han iha rai-laran, Governu rasik foin dadaun husi osan retifikativu mós tau ona osan lubuk ida ba centro logístico nacional para atu asegura armazen nasional para labele mamuk husi absorve produtu lokál uluk prioridade uluk no komesa haree, 12 milhões ne’e tau ona prioridade atu absorve produtu rai laran para atu hatene sirkulasaun osan ne’e depois povu nia produtu lokál sira kuda sai hanesan prioridade ida ne’ebé atu absorve no garantidu katak ita sei sosa mesmu la barak, maibé iha serteza katak ita sei kompra iha ne’eba”,dehan Prezidente CLN, Augusto Junior Trindade.

Orsamentu Retifikativu, ho montante millaun USD 633 resin Governu submete ba parlamentu nasional iha fulan marsu, hodi husu alterasaun, orsamentu refere hetan votus afavor 44 iha parlamentu nasional iha fulan abril liu ba, no prezidente repúblika promulga ona iha loron ha’at fulan maiu ne’e. Ina

 

Leave a Reply

Your email address will not be published. Required fields are marked *