Komunidade Díli husu ai-han ba Madre Canossiana Balide

Komunidade husi Camea, Bedois, Fatu-ahi, Darlau Remexio no fatin seluk tan iha Díli, husu ai-han ba Komunidade Canossiana Balide, tanba hamlaha iha tempu serka sanitária no konfinamentu obrigatóriu.

“Fulan ida resin ona kada loron sempre hanesan ne’e, komunidade hosi fatin-fatin mai iha ne’e hodi husu ai-han”,dehan Madre Canossiana Balide, Guelhermina Marçal, ba JN-Diário, Segunda (10/05/2021) iha Balide, Díli.

Madre Canossiana Balide, Guelhermina Marçal, hatete, ai-han ne’ebé Madre sira fó mak hanesan, foos kilo 10, suprimie, mina, susu-ben no seluk tan. Maibé agora komunidade Canossiana laiha ona forsa, atu fó sasán hanesan ba komunidade, tanba sasán ne’ebé iha la’ós hosi Canossiana nian, maibé tulun hosi Asosiasaun Xineza iha Austrália no Timor-Leste Vision.

“Ohin dader deit ami fahe ona foos saka 200 no seidauk konta tan ho sira ne’ebé agora sei hamrik hein hela no lor-loron sempre hanesan ne’e. Fulan ida resin halo ami forsa laiha tanba aihan ne’ebé Madre sira hetan atu uza ba han no oituan fó apoiu ba atividade Misionaria”, dehan Madre Gulhermina.

 Nia subliña, Governu aplika regulamentu atu ema hotu hela deit iha uma, maibé Governu tenke hare katak, regulamentu aplika bainhira ema bosu, tanba se ema hamlaha ne’e ladun diak, tanba hare ba situasaun agora komunidade iha Díli balun enfrenta hamlaha no sira labele kumpri regulamentu tanba deit sira nia kabun.

“Kada loron komunidade ne’ebé mai husu ai-han loron ida bele iha familia to’o 200 resin maibé bele liu hosi ne’e tanba dader to’o lokraik sira sempre nakonu iha ne’e. Komunidade sira ne’ebé mai husu aihan ne’e sira akompañia informasaun hosi média no balun uluk refujiadu, ne’ebé sira hatene katak, Komunidade Canosiana desde uluk sempre fó aihan ba ema ne’ebé presiza”,.

Maibé Madre Guelhermina mos relata, depende ba kuantidade ai-han, kuandu ai-han iha fó, maibé laiha, madre sira mos labele halo buat ida, tanba apoiu ne’e laos ba komunidade deit, maibé ba mós estudante sira ne’ebé hela iha kos, tanba sira mós hasoru problema falta ai-han.

“Governu aplika regulamentu maibé tenke iha faze normal, maske ema kritika dehan Madre sira la eduka ema, maibé atu halo oinsa karik komunidade sira mai hamrik hosi dader to’o lorokraik  no ami labele husik sira hamrik deit hanesan ne’e, entaun ami tenke fó aihan oituan tuir forsa ne’ebé Canosiana iha”.dehan.

Tanba ho impase polítiku, Estadu emerjénsia, serka sanitária tama tan ho dezastre naturál halo povu hamlaha no ida ne’e susar tebes tanba povu hasoru problema bo’ot.

Abitante Suku Camea, João Araujo Soares, hatete, tanba kabun hamlaha mak obriga tenke mai husu apoiu ai-han ba Madre sira nune’e aguenta netik moris, tanba laiha ona ai-han no labele halo buat ida, tanba kumpri Governu nia regra hela iha uma deit.

“Governu nunka asiste povu nia moris hodi tau matan ba povu ne’ebé enfrenta hamlaha, tanba ne’e ami husu hahan ba Madre sira atu ajuda netik aihan ruma ba ami nia kabun tanba agora labele halo buat ida no labele sai ba buka osan liuhosi fila liman tanba deit Governu bandu komunidade halao atividade, hodi hela deit iha uma”.haktuir.

João realsa, Corona halo povu ki’ik sira hela iha uma deit, entaun hakarak ka lakoi tenke husu apoiu ba Madre sira tanba sei husu ba Governu mak Governu sei la fó tanba Governu hakarak povu tenke servisu rasik.Fel

Leave a Reply

Your email address will not be published. Required fields are marked *