Komunidade la konkorda PNTL obriga tuir swab test

Polísia Nasional Timor-Leste (PNTL), Munisípiu Díli, hala’o pasa revista ba komunidade sira ne’ebé hala’o movimentu ho transporte iha kapitál Díli no obriga komunidade sira tuir hotu swab test. Tanba ne’e halo komunidade sira la simu tanba aproveita ho pasa revista obriga ema tama ba tuir swab test hodi deteta COVID-19.

“Pasa revista ida ne’e hanesan aproveita hodi halo swab test, tanba Polísia sira haruka ami tama, haree ba parte saúde mos prepara tiha ona iha ne’e hodi obriga ami tuir swab test. Tanba ne’e mak ami la simu ho hahalok a’at sira ne’e, ne’e obriga deit. Saida mak obriga deit hanesan ne’e? Buat ida obriga povu ne’e tempu Indonézia nian, la’ós agora mos obriga hanesan fali ditadura ne’e. fatin ne’e la’ós patu halo swab test”,dehan Mário Silva de Araújo, ba GMN, Tersa (4/5/2021), iha Polísia Akademia Comoro, Díli, hafoin sira tama swab test,ne’ebé parte saúde mak fó.

Maske nune’e, Porta-Voz PNTL Superintendente Xefe Arnaldo Araújo,  responde katak,   membru PNTL haruka  ema balun fila ba uma, tanba espasu iha Sentru Formasaun Polísia la sufisente.

“Ohin   ita haree ema balun koopera diak, maibé ema balun la koopera. Tanba balun hakarak ba lalais uma, depois mosu dezentendimentu balun. Ita hatene  katak sentru Formasaun ne’e labele tau ema barak, entaun  ita-nia membru Polísia haruka balun fila, tanba fatin ida ne’e la sufisiente não quer dizer  sira fila ba uma la swab test ona, se karik Polísia hetan sira, sira mós sei tama ba swab test ida ne’e para hatene ema sira ne’e moras ka la moras”,esplika Porta-Voz PNTL Superintendente Xefe Arnaldo Araújo, ba jornalista sira iha Sentru Formasaun Polísia Comoro.

Arnaldo Araújo akresenta, pasa revista ne’e la’ós para de’it iha loron ne’e, maibé sei kontinua hala’o to’o loron sanulu resin tolu fulan ne’e.avi

Leave a Reply

Your email address will not be published. Required fields are marked *