Primeiru Ministru (PM), Taur Matan Ruak, orgullu tebes, tanba númeru kazu COVID-19 ne’ebé atualiza husi sala situasaun Sentru Integradu Jestaun Krize (SIJK) loron ba loron sempre tun ba bei-beik.
“Ha’u kontente los, tanba tun ne’e signifika katak ita vasina, ita-nia kampaña vasinasaun í liu-liu ha’u fó parabens ba Díli, tanba primeira doze, segundu doze kuaze ultrapasa setenta e tál porsentu ne’e di’ak los,” dehan Xefe Governu Taur Matan Ruak, Kinta (14/10) hafoin enkontru semanál ho PR Francisco Guterres Lú Olo, iha Palásiu Prezidensiál Nicolau Lobato Bairo-Pité.
Kona-ba persentajen kampaña vasinasaun iha nível nasionál no Munisípiu sira, Taur iha esperansa katak, to’o fulan Dezembru tinan ne’e, bele atinje to’o porsentu 80.
“Dezembru ne’e ita-bele atinje 80 porsentu, espera ne’e bele atinje ne’e di’ak bele ajuda ita normaliza fali situasaun liu-liu fasilita ita-nia atividade, no tinan oin elisoins presidensias no atividade ekonómika” hakotu.
Atualizasaun dadus husi SIJK, to’o loron 14, fulan ne’e, Timor-Leste rejista kazu COVID-19 foun 6, kazu rekuperadu 26, kazu ativu 111, kazu komulativu konfirmadu hamutuk 19.694 no kazu óbitu hamutuk 119.
No dadus vasinasaun iha Munisípiu Díli ba doze dahuluk atinje ona porsentu 79.8, no doze daruak mós atinje ona porsentu 71.0. Ba territóriu nasionál doze dahuluk atinje ona porsentu 66.2, no doze daruak foin atinje porsentu 42.2.Ben
